2010
04282027答喙鼓：咱來鬥陣講中秋
阿娟：(演后羿的角色出場)嫦娥啊嫦娥，你來共我誤；你哪遮(tsiah)夭壽，我的命會休。
阿月仔：(佇後壁喝咻出場)阿娟啊！阿娟啊！猶無(ah-bô)，你是佇(tī)遮起悾顛(khong-tian)，那會親像猴齊天。
阿娟：原來是阿月仔。小等咧，這馬，觀眾裁判(tshâi-phuànn) 攏佇遐。人講：「花食露水(lōo-tsuí)，人食嘴水(tshuì-suí)。」做人著愛有禮貌，逐个(ta̍k ê) 才會講咱 (gâu)。我是阿娟。
阿月仔：我是阿月仔。
兩人同齊：佇遮向逐家(ta̍k-ke)請安佮問好。(同齊行禮)。
阿月仔：著啦，拄才(tú-tsiah)你是咧創啥(tshòng--siánn)，哪會(ná ē)喝(huah)甲大細聲？
阿娟：無啦，啊就今年的中秋，阮有準備欲搬戲，〈嫦娥奔(phun)月〉是戲齣(tshut)，我的角色是后羿(hōo-gē)，拄才毋是咧著災(tio̍h-tse)。
阿月仔：借問后羿是啥人(siánn lâng)？
阿娟：講甲予你捌(bat)，喙鬚好拍結。
阿月仔：(越頭就欲走)
阿娟：阿月仔，你莫(mài)走啦。
阿月仔：看你攏無發喙鬚，按呢知影你毋捌，想欲來去問別人。
阿娟：莫(mài)按呢啦。我來講古予你聽：古早日頭有十粒，百姓痛苦受災劫；了後后羿來出現，神弓射日九粒連；眾人欠伊恩情債(tsè)，煞來捒(sak)伊做皇帝。
阿月仔：故事講了講啥貨？
阿娟：按呢繼續講主題。
阿月仔：煮茶哦？煮茶我就攏總會，欲愛紅茶青草茶，猶是(ah sī)甜茶老人茶。
阿娟：毋是啦，咱的主題是中秋。
阿月仔：按呢著來臆謎猜(ioh-bī-tshai)。
阿娟：欲出啥題做你來。
阿月仔：按呢妳著聽清楚：青布包白布，白布包柴梳(tshâ-se)。
兩人同齊：柴梳包蝦米，蝦米包酸醋。
阿月仔：這个你嘛知？
阿娟：到今(tann)你才知。這條足簡單，講甲強欲(kiōng-beh)臭酸去，就是中秋的果子，柚仔就是伊名字。
阿月仔：實在有夠 (gâu)。
阿娟：(細聲講) (猴)就欠一支(tsi̍t ki)尾。
阿月仔：來、來、來，我問你，較早刣(thâi)雞會唸講：「做雞做鳥無了時，你著(tio̍h)趕緊去出世，毋通共我膏膏纏(ko-ko-tînn)，好額人兜(hó-gia̍h-lâng-tau)做囝兒。」按呢你敢知(kám tsai)影柚仔刣了愛唸啥？
阿娟：(趕緊搶咧講)我知，我知！天清清，地靈靈，拜請眾神明。
阿月仔：毋是啦。是「哈(ha)--，甜的來，苦的去柚仔跤。」
阿娟：hòo，按呢了解矣。這馬我問你，咱講月娘有樹蔭(tshiū-ńg)，彼欉(hit-tsâng)會當講啥古？
阿月仔：我知，我知！叫做「蜈蚣(giâ-kang)罰跪」，就是一隻蜈蚣咧罰跪。
阿娟：毋著啦，是「吳剛(Gôo-kong)伐桂(kuì)」。
阿月仔：著啊，「蜈蚣(giâ-kang)」的讀冊音就是「蜈蚣(Gôo-kong)」，所以「蜈蚣(Gôo-kong)罰跪」就是「蜈蚣(giâ-kang)罰跪」。咱講月娘頂頭蹛嫦娥，猶有舂(tsing)藥仔的玉兔，按呢，閣(koh)有蜈蚣無毋著。
阿娟：毋著啦，「伐桂」是「剉(tshò)樹仔」的意思，故事講「桂」是樹名，五百丈是樹仔懸(kuân)，剉了傷口會復元，所以吳剛剉袂完。
阿月仔：故事講了有夠好，人講「月驚月半，年驚中秋」，實在時間過緊緊。
阿娟：故事謎猜講袂盡，希望各位眾來賓；食完月餅佮四果，環境(khuân-kíng)衞生就愛顧。
兩人同齊：最後祝福咱逐家，全家團圓(thuân-înn)過佳節(tseh)；希望後擺閣再會，做伙啖糝(tām-sám)來食茶。
阿娟：阿娟。
阿月仔：阿月仔。
兩人同齊：落台做伙來行禮，有閒才來阮兜坐。(行禮，退場。)
沒有留言:
張貼留言