2010
10241747謎螺
水生螺仔(tsuí-senn-lê-á)敢會行無性生湠(hîng bô-sìng-senn-thuànn)？這我毋知，毋過，阮兜的魚箱仔內開始的時明明就是一粒水生螺仔，經過三個半月，這馬內底煞有七粒水生螺仔。
三個半月來，伊一直改變我對螺仔的觀念佮看法。
1. 起源
代誌是按呢來的。
佇七月11日彼工早起，就是阮去苗栗耍，隔暝欲轉來的早起。想講細漢的時，我定定有機會通仔佇水溝仔底掠魚仔、鰗鰡、鱔魚兼摸蜊仔。這馬的囡仔較無機會按呢做。阮來[辶日]迌的所在是佇溪仔邊，所以，早頓食飽了後，我就tshuā兩个囡仔去溪仔邊掠魚仔栽。其實，佇食早頓進前我就去過溪仔邊巡一下仔地形佮所在，我知影佗位有魚仔囝通仔掠。
了後，阮某的妹妹嘛tshuā in一家伙仔來掠魚仔。阮掠十幾隻的魚仔囝轉來，其中有一粒水生螺仔是阮查某囝掠的。彼粒螺仔彼時陣差不多0.3公分大。
2. 失踪
掠轉來的魚仔囝，囥佇阮兜的魚箱仔內底，干焦知影魚仔有減少去的情形，兩禮拜無到就賰五隻，彼粒螺仔嘛失踪幾若工無看著矣。因為阮某厚操煩，驚魚箱仔有死過魚仔會有對人無好的病菌，無愛魚箱仔閣囥佇遐。我只好共箱仔搬去陽台囥，想講囥遐嘛好，加減會曝著日頭。箱仔囥好勢了後，心內足後悔共魚仔掠轉來飼的，賰五隻，毋知這五隻猶會當活偌久？
3. 再現
差不多過成禮拜，魚仔死甲賰兩隻。我就佇遐看魚仔，三看四看，結果看著彼粒水生螺仔猶佇咧。看伊無振動，嘛毋知影猶有活咧抑無。看著伊的時，心裡足歡喜的，原來伊猶佇咧，嘛共阮查某囝講這个消息。
過差不多半個月了後，生青苔的魚箱仔看無啥會著螺仔，毋過，發現玻璃做的魚箱仔壁有一跡足清氣的。阮囝早就看著矣，講伊感覺足奇怪的。
4. 身形
過轉工，我開始閣揣螺仔，看著伊的時，已經變雙倍大矣，第一遍看著伊真真正正的形矣，伊趖(so5)佇玻璃壁頂，看伊的腹足(hok8-tsiok4)貼佇壁面看起來佮海裡一種叫海天使足成的，伊的目睭的所在根本看起來佮露螺差足濟的，看起來就是báng gà皮卡丘的耳仔仝款。
5. 速度緊
看伊趖(so5)的速度，比我所想的螺仔的速度閣較緊三倍，一下無注意，就無看著伊的影跡，予我毋敢相信螺仔的速度哪會遐爾緊。而且嘛確定青苔是伊食去的。
看伊平平安安一工仔一工仔大，三不五時仔出去陽台看魚仔的時，揣伊的影跡變成足心適的代誌。
6. 通光的殼
螺仔沓沓仔大，有一工，看著伊仝款佇玻璃頂趖，已經大甲看會著伊的喙一直動袂停，看著伊的身軀邊仔有紅色佮青色的色彩，心內當咧奇怪，伊哪有這款色彩，以早攏無看著。閣斟酌共伊看，我才發現，紅色的點會振動，袂輸咱的心臟仝款一直跳袂停，青色的物件毋是佇外表。到這陣，我才發現著伊的殼原來是通光的，除了斑點以外，其實，普通時仔看著的色彩原來是伊的身軀本底的色彩，所以我才看袂出來伊的殼是通光的，因為普通時仔看著的螺仔殼、田螺殼、蜊仔殼、蚶仔殼、蚵仔殼等等攏毋是通光的，這是我第一遍知影螺仔殼嘛會使通光。當時仔青色的部分就是伊食落去腹肚底的青苔，嘛是因為伊佇殼內底的身軀嘛是通光的關係。彼个一直咧振動又閣紅色的點應該就是伊的心臟矣。
7. 泅水
有一工，閣來看伊矣，阮囝比我先佇遐看伊，阮兩个看伊速度足緊順著玻璃壁一直衝一直衝，敢若是欲到水面的款，咧欲衝到水面的時，我心內想，伊是毋是想欲順玻璃趖出來水面，就像金寶螺仝款。佇這个時陣，我佮阮囝攏看著阮想袂到的代誌。伊身體變成90度，順著水面繼續趖，就親像水面嘛是一塊玻璃仝款，看伊趖甲完全離開玻璃矣。伊的速度竟然攏無變！水面就敢若完全是一塊玻璃仝款！阮兩个看甲遨遨遨，想袂到伊嘛會泅水。我詳細看伊的動作，可能是目睭看袂出來伊的動作，所以，完全毋知影伊是靠啥物款的動力來泅水的。
8. 漂浮
這个動作我無親目看著，是阮查某囝講的。有一改，換我佮阮查某囝佇遐閣看伊，就講著頂遍看著伊泅水的代誌。阮查某囝就講伊有一遍看伊就直接對上下底，就直接放開，按水底沓沓仔浮起來到水面，一時仔就閣家己沉落去水底。到今，我猶無看過，毋知影伊講的是真的抑是假的。
9. 分身
時間過兩個外月，伊嘛大到差不多有1.5公分大，毋過，我感覺奇怪，哪會感覺伊的身體變較細去，嘛無啥看伊振動，是毋是死去矣，抑是咧準備過冬，因為我想講俗語講：「田螺含水過冬--候時機。」想講伊是毋是嘛會準備欲過冬。
過幾若工，攏無看著動靜。這个時陣，我去看著一粒佮阮掠伊轉來的時差不多大粒的螺仔。敢講，伊是感覺伊欲死去矣，才家己生出一个分身，就是咱講的去死還生的方法。敢有可能？螺仔敢會像水螅抑是渦蟲仝款行無性生湠？較早讀冊的時無學過，干焦知影螺仔是公母仝體的，就是半陰陽的。就算講半陰陽的嘛愛兩隻才有法度生湠，家己是無可能會生湠的。對我來講這个分身是一个謎。
10. 欲死欲死
發現分身的過轉工，我看著本尊伊恬恬佇一粒細粒石仔頂頭，我共石仔提掉，閣共伊擲轉去，擲落去因為重心的關係，伊佇水底變倒頭栽。看起來伊足虛的，有看著伊咧振動，想講伊會家己翻身過來，我就無管伊，就做我走矣。
閣過一工，阮囝講伊死去矣。我的心內足後悔昨昏無插伊做我走，是毋是因為翻身翻無過來，自按呢去予淹死。我就趕緊出來看，看著伊維持倒頭栽的原樣，無看著身體，我就共伊罟出來。掠起來看，伊的肉勼做一丸仔囝，看起來色緻無親像死去的款。
我就對邊仔的盆栽內底挽一枝草仔枝，用草仔枝共輕輕仔撞，撞看伊有反應無。我斟酌看、斟酌感覺，看著身軀佮喙的水影有振動的款，差不多試十分鐘左右，我的結論是伊猶活咧。這遍，我就好禮仔共伊囥予伊好勢，佳哉，伊猶有活咧。過幾點鐘了後，我看著伊的位置無啥仝款，離原底囥的所在差不多有3公分。
11. 死去矣
時間咧過足緊，嘛幾若工無來看伊矣。阮查某囝出去看伊，伊就隨喝講螺仔死去矣。一聽著，我嘛緊去看，有影呢，肉無去矣。是毋是去予魚仔食去矣？共殼罟出來，有看著像腸仔肚糊糊的物件漂出來。又閣賰一隻螺仔矣。敢講分身就是為著生命的延續？敢講這款的情形會一直演落去？這時陣的分身嘛大到差不多有0.6公分大矣。伊是按怎出現的，對我來講是一个謎，這个謎毋知到當時才敨(tháu)會開？
12. 新生
自從伊死去了後，我一直咧懷疑伊並無死。敢會像寄生仔仝款，伊會換殼？因為伊原本的殼對虛荏(lám)的伊來講已經是傷過大閣傷過頭重，所以伊欲共彼个重重重的殼擲掉？紲落去的幾若工，我的目睭一直咧搜揣(tshiau-tshuē)伊的形影。
幾若工過去矣，有一工，我閣看著一粒0.3公分的螺仔出現，我想這粒應該就是伊矣。伊應該是共舊殼擲掉，揣一个無人攪吵會著伊的所在走去覕(bih)起來。等到伊新的殼形成了後才閣出來。
13. 出現第三隻
頂禮拜，阮囝講欲用電腦，我就讓予伊用。就閣出去看螺仔一下。佇遐揣啊揣，兩隻攏看著矣。三看四看，奇怪，目尾敢若有一个影咧振動。我就順著目尾的影去揣，結果，去看著第三隻。就隨共阮囝喝聲講螺仔有三隻。我想，阮囝無啥相信會有第三隻出現。
14. 攏總有六隻
昨早仔，是好日，阮舅仔準備欲入厝。中晝愛去予in請，阮某佇十點半就先載阮查某囝去in兜，我愛等阮囝拜六的輔導課煞轉來才出門。想講無代誌就來看螺仔一下。
佇遐一直看彼三隻螺仔的動靜，有一隻一直佇水底趖，拄好是向我的方向趖過來，袂輸得是欲來共我這个主人行禮仝款。過無偌久，我就看著佇伊的面頭前五公分左右的所在，嘛閣有一隻！哇！這馬有四隻螺仔矣！敢猶閣有？我的目睭又閣開始一个所在一个所在詳細搜揣，心內嘛愛記in的位置，若無，一時仔的時間就毋知影in走去佗位去。我沓沓仔揣沓沓仔看，又閣揣著一隻，繼續揣，揣到尾仔有六隻。到底in是按怎出現的？而且攏差不多平大隻。敢講攏總是第一隻的分身？
15. 看著第七隻
去予阮舅仔請轉來了後，就和阮囝閣來看螺仔，無偌久，阮囝就入去矣。我繼續看，一隻一隻繼續揣，六隻攏總揣著矣。位置嘛攏一清二楚矣。雄雄，我去看著第七隻。無啥敢相信，一隻一隻算，有影是七隻。咦？哪會感覺欠一隻？我相信有八隻，足成欠第一隻分身的款，因為這七隻看起來有較細粒。抑是我去花去矣？較按怎揣就是揣無第八隻。
16. 神秘的第七隻
過幾若點鐘了後，我閣去看螺仔，較看就是六隻，第七隻毋知走去佗位覕起來。今仔日，嘛是仝款，就是無看著第七隻。毋知後禮拜螺仔會變幾隻？
17. 期待
這馬確定有七隻螺仔，毋知會去看著in的互動關係袂？毋知會閣去看著我想袂到的代誌袂？in敢會相拍？抑是in敢會像貓仔仝款會分地盤？有遮爾濟螺仔，我的心內有期待。冬天來的時陣，in毋知度會過袂？心內有足濟疑問想欲知影。我會當做的代誌就是繼續看in的發展爾爾。
螺仔會家己無性生湠喔
感謝分享
夢生觀察螺仔誠心適 生活中加一項趣味事喔~
感謝分享