2010
07261124欲滇矣(beh tinn7--ah)
時間是一項足恐怖的物件，有的變無，無的變有，經過一段時間了後，前後做一个比較就會發現矣。
自今年二月二十七號意外成功起這个網站開始，五個月內的時間，來我遮行踏的人數將近8500人，這款的數字是我料想袂到的代誌，真正足意外的。
這个blog無形中開始改變我的生活習慣佮足濟觀念。
原本的我一直生活佇家己的世界，時常共家己當做是佇都市鞏久理(khong7-ku5-li2)欉林的隱士。用現代的講法，我是超級宅男。完全無關心外口的變化，無啥看電視，罕得看報紙(因為90%攏是歹代誌，看了心情愈bai2)，無食薰(戒薰運動獎金領袂著)、無啉酒(公買局趁袂著我的錢)、無啉咖啡(好佳哉有足濟人啉，若無咖啡店會倒了了)、無泡茶(佳哉四界攏有人泡茶，若無種茶的人煞無法度生活)，除了食三頓以外，會當講啥物都攏無，甚至連手機仔都無。
講較好聽咧，是安貧樂道，是淡無慾，是平安過日，享受閒雲野鶴的生活。人講：「偷得浮生半日閒，快樂似神仙。」我欲愛半日閒，毋免去用偷的，隨時欲愛就有。前兩冬景氣足bai2的時，我甚至等於有一冬是完全無收入的人(啥叫我到今猶咧佇人生苦海咧沐沐泅)。有朋友共我講：「你連泡茶都無，你的人生閣有啥物趣味？」
佮朋友交陪，我攏是保持「君子之交」爾爾，所以佮交陪上久長的老朋友見面的頻率一兩冬才一遍是正常的。
佇耍blog進前，我毋捌去共人留話抑是做回應，甚至無可能連紲看幾若篇文章。這馬的我，會時常去人遐行踏，留話佮做回應，看文章會時常就一遍看三、四十篇，相片一看看千外張，影片一看看十外片。若blog文章較少的(一般攏是佮我差不多仝時間起blog的所在)，我就一睏頭全部看予完。文章較濟的就分幾若遍，一直看到彼个blog的一个分類文章看完。
講甲lo3-lo3長，佮標題欲滇矣一點矣關係都無。是啊，是無關係，毋過，根據這五個月來的經驗，我的主目錄確實是欲滇矣，因為這件代誌才予我做一寡五個月來的聯想。
自無幾篇台語文開始，就知影網頁的資料無法度囥傷濟，自從做百外篇的超連結開始了後，逐遍有新增連結就足驚主目錄會去超磅囥袂落去。一直到昨，才發現佇時間的累積之下，我的主目錄已經囥將近300篇的連結，揤pagedown的畫面嘛累積到七頁遐爾長。嘛致覺著我的主目錄確實欲滇矣，足緊就會去拄著。當拄著的時陣，我就愛開始想辦法來解決會拄著的問題，上大的麻煩就是有可能愛改變所有的超連結，若按呢這時陣的工程就足大咧囉。
原本超連結是欲予人看文章方便用起來順手才用的，當畫面累積七頁的時，我才發現主目錄本身的使用開始無方便矣，因為網友來到遮行踏就愛有耐心才知影我的主錄內底的十二項分類是啥物。
欲滇矣，開始愛準備來想解決的方法囉。
我有兩點問題
一 我不會耶
二 我介紹俗語是想為推廣母語的工作盡一分棉薄之力
除了給會台語的人看還要給不會台語的人了解
我一直在掙扎(寫小說也一樣)若用台語會不會讓人看不懂而失去興趣
所以還是選擇現在的做法
你的看法如何
台語是咱的母語, 我知影你算起來是我的前輩, 佇語感方面一定是比我較強, 而且對你寫的聯文來看, 你的用字方面造詣是高手中的高手, 教育部這馬有袂少的資料會當予咱做參考, 前輩若改用母語來寫, 我相信你一定有無仝款的感受.
台語有一句俗語講:驚驚袂著等, 實際落去寫就是矣.
若真正驚人會看無, 佇台語的專用詞才用註解的方式, 難字部分會使用台羅拼音標注佇漢字的後壁. 台羅字嘛公佈有五年矣. 若無人欲實際來寫, 現在這馬的國小的囡仔, 攏加減有學台語, 咱若有較濟台語網站存在, 遮的囡仔才有機會閣繼續接觸著台語文, 若無機會接觸, 以咱現此時的教育, 國中的二年了後就罕得會閣接觸著機會. 咱若有法度予愈濟人來寫台語, 無形中來培養囡仔致覺著看捌台語文變成是必需的能力的時, 咱的母語生湠才有希望. 佇我看來, 阮兜將來20冬後, 阮囝若有娶某生囝, in囝可能就完全袂曉台語, 用阮的家族來講, 台語到我的孫的時就滅亡矣. 咱台灣毋知有偌濟家族的母語其實這陣就滅亡去矣.
我毋是理論派的人, 所以我袂驚講寫台語 人看無就用華語來寫.
..
教學相長，進步是看會到的