108年全國語文競賽閩南語朗讀(高中組)

 2020

08262213108年全國語文競賽閩南語朗讀(高中組)

1175整理篇

(轉去108年全國語文競賽閩南語朗讀50篇目錄)
(轉去主目錄)

 

01 綿仔紙佮阮滾耍笑　　賴又嘉

02 白糖粿　　陳雅菁

03 變魔術　　吳政修

04 我的人生，我創造。　　陳美虹

05 快樂毋通凊彩　　楊玲怡

06 來去看飛行機生卵　　曾文慧

07 踮大雪山頂種樹仔　　曾裕櫑(luî)

08 公車　　張淑芳

09 潮州燒冷冰的故事　　朱志煒

10 愛媠的代價　　黃琬芸(ûn)

=====================================

 

01 綿仔紙佮阮滾耍笑　　賴又嘉

　　國際紙漿欲起價矣！綿仔紙的廠商放風聲講價數欲綴咧起。這个時陣，樓頂招樓跤、厝邊招隔壁、親情五十綴咧傱……是欲去佗？逐家攏傱對大賣場去囉！

　　紙漿會當做真濟物仔，是按怎獨獨是綿仔紙上敏感？原因是咧「趕緊」的時陣無伊就袂使得所致，電視若開開，逐工攏是咧報某乜賣場人𤲍 人， 相爭搶綿仔紙。騎oo-tóo-bái、駛自家用的來搬，當然是無夠看，li-á-khah 和貨車攏出動矣，才是厲害。毋知的人叫是欲相戰矣，消息無夠靈通的人叫是咧搬免錢的。我這个跤手慢鈍的人煞一粒頭兩粒大？我厝裡拄好賰一包，我嘛干焦想欲佮平常時仝款捾一捾綿仔紙轉去，無疑悟，熟似的架仔頂哪會空空空，今，是咧按怎？

　　佇咱這个富裕的臺灣，民生用品講欲愛偌濟就有偌濟，生目睭嘛毋捌看過這款狀況。鼻仔摸咧，閣來去別間看覓。就按呢，走過一間閣一間，也問過一舖過一舖，「無貨囉」逐間都是仝款的回答。我一向誠樂觀，心內猶原想講無要緊，今仔日無，明仔載才閣來。講真的，連紲幾若工攏是加走的，我仙想都想無，是綿仔紙咧創治咱？抑是咧佮咱滾耍笑？頭一改買物件遮忝、遮無步，真正是有錢煞無地買！

　　無奈何，愛敲電話討救兵囉。電話通矣，阿姊的大嚨喉空佇電話的彼爿傳過來：「都叫你愛趕緊，你看，我講甲準準，這馬恁兜愛學印度人仝款用倒手拭……。」當然，阿姊上尾有允我，欲救濟我一捾綿仔紙。

　　當當我去阿姊遐，煞予規厝間的綿仔紙驚著，竟然排規排親像咧共我擛手，閣講：「阮是咧佮你滾耍笑的。」綿仔紙啊綿仔紙，咱莫閣耍矣，敢好？

　　代誌過去幾若個月矣，綿仔紙真正起價矣。彼工我閣去大賣場買日用品，刁故意踅去綿仔紙的架仔看看咧，這馬綿仔紙是窒倒街，欲愛啥物牌子的都有。欲結數的時，閣送我一包綿仔紙。手提這包綿仔紙煞予我起愛笑，底當時「你」哪會予人做伴手咧送？我沿路駛車沿路笑，綿仔紙若親像嘛知影，綴我同齊笑。(TOP)

 

02 白糖粿　　陳雅菁

　　「頭家，共我包三塊白糖粿！」若轉來臺南，我定著會傱來這个所在排列，徛佇人群內底聊聊仔等待這味數念誠久的故鄉好滋味！

　　一塊一塊白phau-phau、幼麵麵的「白糖粿」佇油鼎內底泅來泅去，勻勻仔烰起來。細漢的時，老爸𤆬我來買的記持嘛綴咧浮出來，彼是一種幸福佮滿足。看頭家共「白糖粿」滒一沿塗豆糖粉，就若親像一个幼秀的姑娘仔，穿一領媠噹噹的新衫仝款，予人真意愛。

　　你敢知影「白糖粿」是按怎來的？我哪會遐爾佮意「白糖粿」？其實伊毋但酥酥軟軟、口味好，猶閣有一个真媠的故事。伊原底是用來拜七娘媽的，舊曆七月初七是七娘媽生，傳說彼工是牛郎、織女相會的日子，因為一冬才見一擺面，所以信眾會共大粒的圓仔硩予平，中央閣用大頭拇揤一凹，聽講是欲貯織女的目屎。這種祭品號做「糖粿」，嘛有人講是「碗圓仔」。落尾，有人發見共伊搝予長，囥入去油鼎內底糋，食起來特別芳，沓沓仔就演變做現此時的這个形體，嘛成做臺灣南部特殊的喙食物仔。

　　白糖粿的做法看起來真簡單，提秫米粉直接來做就會使。毋過佇古早時代，愛先共秫米浸一站仔，紲落來挨米、硩米漿、做粿粞、搙做規丸才閣捻做一塊一塊落去糋，上尾囥佇塗豆糖粉內底滒滒咧，按呢芳kòng-kòng、燒燙燙的白糖粿就完成矣，予人看甲喙瀾㴙㴙津呢！

　　佇王浩一先生的「慢食府城」這本冊內底，有記錄著「白糖粿」是漳州佮泉州的傳統點心，我是佇臺南大漢的，嘛誠佮意這種簡單、樸實的厝邊點心。毋過，來到臺北了後，就真罕得聽著「白糖粿」矣！這馬，全臺灣揣無幾擔咧賣白糖粿，逐擺轉去後頭厝，攏會走去買這味！

　　「來喔！你的三塊白糖粿好矣！」排佇插插插的人群內底，提著我數想足久的白糖粿，等袂赴轉到厝就隨咬一喙！「著！就是這味，這就是故鄉的滋味！」

　　觀光客排的是面冊懸頂當時行的古早味，我排的是自細漢以來，囥佇心肝頭甜蜜的懷念。(TOP)

 

 

03 變魔術　　吳政修

　　細漢的時陣，我上愛去夜市仔看王祿仔仙表演，通常攏是咧拍拳頭賣膏藥：有特技表演、唱歌、脫衣舞佮變魔術。其中我上愛看的就是變魔術。逐禮拜五暗時七點，食飯飽身軀趕緊凊彩鑢鑢咧，就兇兇狂狂趕欲去廟口佔位，揀一个袂去予大人閘著的好位。頭前的節目攏是王祿仔咧賣藥仔，講一寡阿沙不魯的代誌，阮囡仔人哪會聽有伊大人是咧講啥貨。精彩的魔術表演，佇節目進行到一半彼跤兜才會開始。變魔術實在是一種足趣味的表演，魔術師會當共物件變無去，嘛會當共細張的錢變做大張的。上𠢕的是共人的跤手骨剁斷，毋但袂流血，閣會當當場接倒轉去。逐家是看甲哀爸叫母，愈驚愈愛看，實在有夠勥！王祿仔仙上愛揣囡仔來創治，有一擺我予伊搝起去台仔頂，伊竟然對我的褲底變一隻粉鳥出來，害我驚甲差一點仔滲尿，予現場的阿公和阿媽是笑甲強欲落下頦。

　　就按呢我細漢的時陣，感覺魔術是萬能的。我捌數想欲用魔術共討厭的人變予無去，予恐怖的考試單消失去，抑是予老師雄雄袂記得欲考試。有一擺阿母叫我食會咬喙的菠薐仔，我足想欲共遐的無佮意食的青菜，攏總變做我上愛食的海產。想罔想啦，當頭白日千萬毋通陷眠，做人嘛是愛面對現實，拍拚做工課較實在。

　　毋過，我閣足想欲變一个魔術，共阿母變轉來阮身邊。阿母的腰子嘛洗二十幾年矣，伊佇大前年就轉去天頂做仙矣。雖然變魔術無法度共阿母的身體變勇健，毋過伊若會當看我表演，一定會足歡喜。心情若快活，身體就會較爽快，只不過這馬講遮的攏是加講的。「在生一粒豆．較贏死了拜豬頭」，有孝爸母咱著愛趁早。

　　魔術的世界是迷人的，是趣味的，毋是像一寡王祿仔仙干焦會曉騙人。魔術毋是共痛苦變無去，是改變咱人的心佮奮鬥的勇氣。魔術嘛無可能共失去的親人變倒轉來，是叫咱愛了解世間的無常，珍惜身軀邊的每一个人佮這世人的緣份。(TOP)

 

 

04 我的人生，我創造。　　陳美虹

　　阮小弟自細漢就袂愛讀冊，定定提厝裡害去的電器用品摸東摸西，拆開來研究。爸母攏講伊讀冊毋讀冊，干焦愛烏白變東變西，後擺是欲靠啥物賺食？

　　爸母對囝兒序細的向望阮嘛知影，毋過自細漢摸東摸西，摸出興趣，厝內大大細細的電器用品，真濟嘛攏予伊修理甲好勢好勢，替厝裡省袂少錢，實在真無簡單。

　　國中畢業了後，為著欲替厝裡省錢，所以小弟選擇去讀私立學校的建教合作班。別人咧讀冊的時陣伊是佇工廠咧做工課，學生囡仔歡喜歇寒、歇熱會當相招出去𨑨迌的時，伊才轉去學校讀冊。知影家己的爸母無像別人兜遐好額，自伊讀高職了後就誠認真讀冊，逐擺攏考頭名領獎學金。高職畢業就直接去做兵，嘛毋免共厝裡提錢，實在予人感覺真貼心。

　　退伍了後，小弟感覺伊家己的學識無夠懸，所以就閣考二專。二專畢業了後，有興趣想欲做老師，就參加插班大學的考試，尾仔考著高雄師大。毋過彼个時陣無偌濟老師的缺，伊就直接去考國家太空中心做工程師。靠伊的專業技術佇遐做研究，是無啥困難的。

　　二○一七年八月二五，福衛五號送去美國，佇加州范登堡空軍基地順利發射升空，這毋但是太空科技的成就，嘛是咱臺灣人的驕傲。我共伊恭喜，講伊實在真無簡單，會當參與遮爾盛大的工課，而且閣予中心派去美國做第一線的觀察人員。伊笑笑仔講：「我佮意這項工課，而且這嘛是我的本份，我只是盡家己份內的責任爾爾。一件成功的代誌是愛靠團隊的合作才會圓滿，我只是這个團隊裡一粒小小的螺絲釘啦！」

　　聽著伊按呢講，心內實在真感動。我嘛佮伊分享講：「恁逐家攏佇家己的工作上認真做到上周至，嘛佮團隊保持上好的連結，才有今仔日的成果。一粒小小的螺絲釘無法度發揮伊的功能，毋過佇團隊裡，若是有任何一粒螺絲釘落去，就袂當完成這个重要的任務矣！」

　　對阮小弟身軀頂，我看著伊靠家己的意志創造伊美好的人生！(TOP)

 

 

05 快樂毋通凊彩　　楊玲怡

　　五月，為著欲做母親節的海報，就教囡仔用色紙來鉸花。這節課的學習目標是欲予囡仔學會曉用色紙對拗了後，用筆共設計的花瓣畫予好，上尾才共無愛的部份鉸掉，展開就是一蕊花囉！

　　頭起先，我先解說一遍。看老師一步一步做落去，若親像咧變魔術仝款，逐家目睭金金相，喙仔笑甲裂sai-sai。等到花瓣展開的時，雄雄逐家攏「哇！」一聲，「足媠的！」「老師！阮嘛欲做啦！」看著囡仔遮爾愛學習，做老師的哪有講毋好的道理咧？拍鐵，當然愛趁燒啊！

　　每一个囡仔看著老師欲分色紙，就開始慄慄掣，手伸甲長長長，喙那喝咻「老師，我無提著，我無啦！」規間教室鬧熱滾滾，袂輸鳥仔囝毋知枵偌久矣，喙開開等鳥仔母來飼。分好矣，有人是足急性，較凊彩，無十秒鐘就喝「好矣！」毋過，對拗的所在，角愛拄角，紙邊愛疊予整齊，伊攏無注意著，干焦歡喜欲拗紙。嘛有人沓沓仔拗，逐爿都對甲足齊的。紲落來愛畫花瓣的形體，這步就是鋩角的所在。因為對拗的紙，若欲成做一蕊花，中央的所在愛相連，絕對袂使鉸掉，若無細膩鉸毋著爿，花瓣就一片一片散開去，毋成樣矣。為著欲予囡仔知影這步的重要，我閣特別共強調。

　　畫好了後，有人真頂真，會先展開檢查看覓；有人畫好，看看咧無啥自信，就攑手問老師，啊嘛有一兩个較好膽的，誠勇敢，先鉸才講。這段過程，我感覺足趣味的，就放手予試看覓。最後一步鉸落去，鉸了又閣是一遍的驚喜，有人是懸聲喝「哇！」有人是低聲喝「哇！」平平哇一聲，一下聽就知影啥人鉸出一蕊花，啥人鉸甲花花花。

　　佇這遍的活動當中，我發覺囡仔攏誠歡喜，就算鉸了䆀去猶原是笑咍咍。對來講，毋但會使那做那學，閣會使對錯誤當中學習，是上有價值的所在。毋管咧學啥物，保持快樂的心情，骨力學毋通凊彩，表現出來的精神、態度佮品質，絕對是一粒一的，實在予人會呵咾得！(TOP)

 

 

06 來去看飛行機生卵　　曾文慧

　　讀幼稚園進前，我佮屏東潮州的外公外媽做伙蹛。從有記持開始，便若聽著阿公喝一聲：「乖孫的！咱來去看飛行機生卵！」我就會喙仔笑gi-gi，趕緊起去外公的跤踏車後座。公孫仔兩个人，那唱歌那趕去彼个規大片攏是青ling-ling 的草仔埔， 遐是全臺灣唯一有阿兵哥咧跳la-ká-sáng 的所在。

　　聽阿母講，自我會溜溜走開始，阮外公就足愛𤆬我去看阿兵哥跳傘。好天時仔，阿兵哥訓練的時間一下到，就有一台飛行機慢慢仔對遠遠的天邊飛倚來。阮看著飛行機愈來愈大隻，期待的心情嘛綴咧沖沖滾。無偌久，飛行機就像雞母咧生卵，一蕊閣一蕊的la-ká-sáng 滿天邊。等la-ká-sáng 展開，就親像一隻閣一隻青色的海䖳，佇天頂飄過來閣飄過去，予人愈看愈心適，逐擺我攏看甲目睭展大蕊，歡喜甲吱吱叫。

　　毋但按呢喔，緊張的閣佇後壁。阿兵哥對飛行機頂跳落來，是毋是會成功，就親像八仙過海，隨人變通。有人技術一流，親像鳥鼠仔入牛角，穩觸觸。徛佇阮邊仔的阿伯會共呼噓仔，噗仔聲催無煞。毋過，有的天兵實在予人袂呵咾得，袂輸是目睭花花，匏仔看做菜瓜，煞對邊仔的檳榔園直直飛倚去。用跤頭趺想嘛知，到尾仔煞牢佇樹仔頂，進無步，退無路，叫天叫地嘛無法度。

　　人講天有不測風雲，連孔子公嘛毋敢收人的隔暝帖，跳傘上驚的就是種芋仔兼犁田，明明相準準欲落佇草仔埔，煞雄雄透一陣風，害la-ká-sáng 挽袂轉來，這聲彼个歹運的阿兵哥穩當會摔佇邊仔的打馬膠路，疼甲哀爸叫母！連我用看的，嘛會心臟咇噗跳，活欲驚死，目屎綴咧輾落來，趕緊共阿公攬牢牢。阿公那幌頭，那文文仔笑講：「拍斷手骨，顛倒勇啦！人講：跋一倒，抾著一隻金雞母，後擺，就會愈來愈厲害！毋通驚失敗，跋倒閣起來，你會愈大漢、愈勇敢喔！」

　　潮州跳傘場，會當看飛行機生卵的所在，遐毋但有阿公對我的疼惜，嘛是阿公教我人生道理的所在。佇我的心肝底，已經無任何所在，會當佮伊比並。(TOP)

 

 

07 踮大雪山頂種樹仔　　曾裕櫑(luî)1

　　臺灣有一个種樹仔大王，叫做賴倍元。1986 年，賴桑若像青瞑的毋驚銃，開三千萬買五甲的山坡地，煞去買著一粒糞埽山，車兩千車的糞埽才清出一塊空地仔。就按呢，開始伊種樹仔的人生。這馬伊已經楦甲十粒山相連，山頂攏是懸拄天國寶級的樹仔。這片山林伊無欲賣、無欲剉，嘛無欲留予囝孫，拍算全部攏欲獻予臺灣。

　　若是你有上億的財產，你會按怎開？大部份的人攏會選擇去投資，錢絞錢想欲趁閣較濟錢，抑是開免驚的盡量去享受。毋過這个有數十億家產的賴桑，伊的想法是：「干焦種樹仔投資未來，才會當補償過去咱人對環境的損害。」賴桑用掉所有的家伙去種樹仔，開創一大片曠闊的山林。伊認為共過去人類損蕩的資源，用種樹仔的方式共還轉去予大自然，才是上有意義的投資。伊這種對大自然的熱情佮阿戇仔的做法，予人共譬相做「天下第一大戇人」。

　　賴桑國中出業了後，就開始扞厝裡的運送店。彼當陣，拄好是臺灣農業轉對工業的年代，貨運產業當興，猶未二五歲的賴桑就已經是家產數十億的大頭家矣。花無百日紅，時間經過，伊看著捌服務過的大公司，十間有九間倒。伊認為文明科技的進步比袂過精神的境界，人生是愛追求做大代誌，毋是做大企業嘛毋是趁大錢，青翠閣萬年久遠的山林才真正是永遠的財富。

　　就因為看著山坡地予人翸甲烏魯木齊，定定有塗石流的意外咧發生，伊智覺著臺灣的土地已經袂當閣繼續破壞落去，愛趕緊共樹仔種倒轉去。伊去請教足濟木材行的頭家，共問講：大雪山頂種啥物樹仔較好咧？得著的答案是：種咱臺灣千年的國寶樹，親像松梧、紅豆杉上好。自按呢，這個少年的賴桑就開始伊種樹仔的人生。

　　賴桑用伊的手替未來種落希望的種子，現此時，這片山林有濟濟的性命咧生湠。賴桑用家己的雙手創造千變萬化豐富的生態，伊共天公伯仔予伊的福報，轉變做對臺灣這塊土地的大愛！(TOP)

 

 

08 公車　　張淑芳

　　人講坐公車錢較省，這馬的公車會使講俗閣利便。彼工坐公車，看著鑢卡的機器頂仔，貼一張指指的圖，閣寫『路加』兩字。我坐佇公車頂，心內咧想：『路加』是啥？啥是『路加』？落尾雄雄予我想著，隨笑出來，原來是閩南語的「鑢遮」啦。

　　人佇公車頂，心思煞飛轉去到我小學三年仔的時，因為搬厝，五年仔的阿姊逐工攏𤆬我坐公車去學校讀冊。彼時陣的公車無冷氣，椅座嘛無這馬遮爾四序。椅座若是兩人座的，阮就講彼是情人座；椅座若是長株形、相對相的，阮就講彼是相親座。囡仔人上愛跪佇相親座頂仔，看外口的風景。大人總是叫囡仔愛坐予好，才袂摔落來。彼時陣的公車有車掌小姐咧鉸票，細漢的時陣看車掌鉸票，感覺足奢颺的。公車欲斡正爿，車掌小姐會歕觱仔pi——pi——pi——，司機著聽伊的指揮，沓沓仔斡。毋過後來為著節省成本，煞改做一人服務車，司機著愛駛車閣兼鉸票。彼當陣我讀高中，一下上車就隨問司機先生：「我替你鉸票敢好？」司機若應好，我就歡喜甲共鉸票的家私提咧，「kha——kha——kha——」喙笑目笑替人客服務，袂輸囡仔時代扮公伙仔做車掌仝款，除了感覺趣味以外，嘛體會著替人服務的快樂。

　　佮以早比起來，這馬的公車無論設備、服務攏加真好。等車的時陣，車牌仔有電子字幕，予你知影閣幾分鐘車就會來矣！學生囡仔趕上課，上班的人趕上班，攏免緊張甲一直貓貓看，抑是兩蕊目睭金金相——車哪會猶未來？一下上車看你是欲鑢卡抑是橐錢攏會使得，車頂有冷氣通吹、椅座嘛真四序，有的人閣會那坐那盹龜。老大人坐公車免錢，有博愛座通坐，頂仔閣有安全帶保護的安全。若拄著坐輪椅的人客，司機先生會落車鬥相共，共輪椅捒起去，實在有夠貼心。

　　時代咧進步，未來的科技會予公車成做啥款，我無法度想像，毋過我相信，每一个年代陪伴咱大漢的公車，攏會成做咱成長共同的記持。(TOP)

 

 

09 潮州燒冷冰的故事　　朱志煒

　　足濟去墾丁𨑨迌的人，倒轉來經過潮州攏會順紲停落來食一碗燒冷冰。Ha̋nn，有燒的冰喔？原來彼是剉冰內底囥一粒燒燒的圓仔。熱人食一碗剉冰，tshi 一下透心涼，食咧欲煞閣有一粒𩚨𩚨的圓仔，咬落去甜甜燒燒的餡流出來，有夠讚的滋味。

　　燒冷冰這種物件是按怎來的？故事是按呢，古早古早佇圓環仔附近有一个阿婆仔咧賣圓仔湯。逐下晡，伊對厝裡共擔仔捒來到圓環仔。因為圓仔湯是燒的，寒人的時人客較愛食燒的，生理蓋好，免偌久就賣了了。毋過若是到熱人，有時仔到天暗矣嘛猶閣咧賣。

　　七月的一个下晡，日頭若火爐，打馬膠路予烘一下軟膏膏袂輸會㽎按呢，街仔路無啥物人。阿婆一手提瓜笠仔咧擛風，用另外一爿的手䘼拭汗。嘛毋知過偌久的時間，日頭走無去矣，烏天暗地，風透甲像咧做風颱，phe̋一下大雨到位，佇路裡的人袂赴通走，予沃甲澹lì-lok。

　　毋過這个雨聲佮普通時仔無仝，親像掖豆仔仝款，tia̍k、tia̍k、tia̍k……，落佇桶仔底閣有咚、咚、咚的聲，這敢若毋是雨，啊！是落雹！阿婆仔連擔仔嘛袂赴通收，緊走去亭仔跤覕。

　　無偌久，日頭閣出來矣，烏雲嘛散了了。這个時陣，阿婆仔發見講，伊的圓仔湯頂面有一層厚厚白白，袂輸若礤冰的冰雹。拄才烰好的圓仔，焐著冰，一粒仔一粒圓kùn-kùn，照著日頭閣逐粒金爍爍。

　　阿婆仔想講今這無法度閣賣矣，毋過若共倒㧒捔閣拍損，𣁳一粒仔來食看覓。喔！圓仔皮夭壽𩚨，咬落去到地，甜甜燒燒的餡流出來，猶閣咧衝煙，有夠著味。賰的圓仔捾轉去請厝邊頭尾食，食著的人逐家都呵咾甲。

　　阿婆仔心肝頭嚓一下，想著一步：熱人無人愛食燒燙燙的圓仔，若是像今仔日按呢，共濫佇礤冰內底，一定蓋濟人會愛食。隔轉工阿婆仔的擔仔就加載一桶礤冰佮一寡料，人客叫是阿婆改賣礤冰，等食著燒圓仔，Ḿ！目睭攏金起來，一直頕頭呵咾好食。自按呢，逐个相爭欲來圓環仔食阿婆仔濫燒圓仔的礤冰，燒冷冰的名聲就愈湠愈遠。(TOP)

 

 

10 愛媠的代價　　黃琬芸(ûn)1

　　有一寡人生做尪仔面，看著比同年的人較幼齒，猶毋過，嘛有人老起來等，自細漢就比別人較臭老，這攏是隨人的基因。不而過，這馬醫學美容遮爾發達，真濟人大只的銀票捧咧去揣醫生，有的欲做目睭重巡；有的欲共鼻仔龍骨疊較懸咧；有的欲共國字面削做瓜子面……。當然，逐項攏著愛開錢，閣毋是小可仔錢爾爾，莫怪醫美診所滿滿是，病院的醫生走去美容整形中心，共人點斑、搝皮、抽油、做假奶……。

　　早前猶未有雷射的技術，一寡查某人去開刀搝皮，無細膩割著微神經，煞連欲笑欲哭都無法度自由。新聞定定放送，某乜人去抽油煞感染著蜂岫癰；某乜人割重巡割一下目睭大細蕊；某乜人面肉內底埋線煞變成貓仔面，毋敢出門閣愛開錢拍官司，真正是無枷夯傀儡。

　　為著好奇，我捌去共烏斑、烏痣點掉，嘛捌買診所推銷的產品。遐的醫美業者攏足有喙水，緊紹介診所內底貴參參的療程：搝皮一擺幾萬箍，後擺兩三年著愛閣來一擺，若無就會走山。聽聽咧，我共伊講：「我轉去考慮看覓咧！」就阿婆仔閬港矣。彼五千箍當做開眼界的學費，若欲閣開五萬、五十萬，有影開袂落去。

　　天公伯仔到底是共變老的機關安佇人身上的啥物所在？是按怎我若看著「美魔女」，毋管伊的面抹甲偌白、頭毛染甲偌烏、腰束奶噗尻川閣𠕇硞硞，毋過伊的目神是無法度瞞人的啦。

　　廣告的魔力誠厲害，我嘛捌看著醫美診所的廣告，綴人去注『肉毒桿菌』的射，想欲共額頭的皺紋熨予平。結果，足足半年變殭屍面，連目眉嘛無法度振動。等到目眉會當振動的時陣，皺紋又閣走出來矣。真正是落雨天沃花——無彩工。

　　生做歹看毋是好空的代誌，毋過愛媠敢著愛開大錢？做人善良樂暢好笑神、食食天然閣清氣、環境衛生空氣好、家己加減學一寡掠龍順血路的功夫，人若健康就會媠。若是開大錢討皮疼，閣舞甲拍官司起相告，按呢就算袂和囉。(TOP)