108年全國語文競賽閩南語朗讀(國小組)

 2020

08261744108年全國語文競賽閩南語朗讀(國小組)

2531整理篇

(轉去108年全國語文競賽閩南語朗讀50篇目錄)
(轉去主目錄)

 

01糖霜丸　　郭聿(U̍t)恩

02無尾巷　　周世雄

03夢想新公園　　謝慈愛

04牆圍內的囡仔　　艾(Ngāi)茵

05蝴蝶公主　　王秀容

06歇睏日　　蔡瀚儀

07磅麥仔芳　　黃美銀

08巧豬　　沈瑩玲

===========================

 

01糖霜丸　　郭聿(U̍t)恩

　　我是厝裡第一个出世的囡仔，所以從細漢阿公和阿媽就共我惜命命，尤其是阿媽，伊攏講我是伊的「糖霜丸」。若是有我佇咧，啉水都是甜的，毋免食嘛會飽。

　　其實，我並毋是啥物貼心會弄人笑的囡仔，阿母攏講我是：「雙个旋，惡甲無人問。」拄出世都猶無二四點鐘咧，就予紅嬰仔室的護理師敲電話來投，講我吼甲誠大聲，按怎騙都袂恬，只好來共阿母討救兵。所以，佇別人兜是：「一个囡仔，較鬧熱三个大人。」啊若阮厝是：「一个囡仔，拚倒五个大人。」規厝間的大人，予我這个囡仔疕舞甲食毋成食、睏毋成睏，真正是足忝頭。

　　彼時阿爸、阿母攏佇高雄食頭路，又閣煩惱倩奶母育毋知敢會予人灌米酒袂，才將我囥佇臺南，拜託阿公、阿媽鬥相共。彼个時陣攏已經退休矣，原底叫是𤆬孫就親像：「桌頂拈柑，輕輕鬆鬆。」想袂到我誠纓纏，一定攏愛人抱，連欲睏嘛愛予人抱咧睏，無，就會吼袂恬。阿公、阿媽無我的法，只好三不五時仔就叫阿爸、阿母轉來替手，連猶未嫁的阿姑嘛愛鬥𤆬孫。

　　雖然我遮爾歹𤆬，毋過，阿媽猶是誠疼我，不管是欲去佗位，伊一定會𤆬我去。欲𤆬我出門的時，伊會先用偝巾共我縛佇伊的尻脊骿，才閣用風幔包予絚。所以，我細漢的時，便若看著阿媽提偝巾和風幔，就會緊爬過去阿媽的身軀邊，喙笑目笑等阿媽抱我出去𨑨迌。阿媽講我彼个模樣真正足古錐，就算到今，伊猶深深記佇咧頭殼內底。

　　因為自細漢就綴佇阿媽的身軀邊，毋才我開始學講話的時，講的就是臺灣話。阿媽講我彼時大舌閣興喋，拄咧學話的時，大人一句話攏予我分做三、四節，一直餾、一直餾。若是有人學我講袂輾轉的模樣，我閣會受氣，規个面就膨獅獅，一直愛阿媽來安搭才欲煞。

　　三歲了後予爸母𤆬轉來讀幼稚園，以後的日子嘛因為學業，漸漸較無轉去臺南矣。毋過，便若佇電話中聽著阿媽叫「糖霜丸」的聲，我就會想欲閣轉去阿媽的身軀邊，予伊攬牢牢。 (TOP)

 

02無尾巷　　周世雄

　　猶會記得細漢的時，阮兜是踮佇一條無尾巷的上邊仔間。無尾巷的雙爿攏是干焦兩樓懸的透天厝，因為是無尾巷，所以除了徛家的車出入以外，誠少有外來的車駛入來。而且佇彼个時代，大部份攏是oo-tóo-bái佮跤踏車，所以規條巷仔攏嘛是阮這陣囡仔的天下。

　　每一擺放學轉來到厝的時，阮這陣規身軀臭汗酸的囡仔部隊攏是趁日頭猶未落山，趕緊共彼時家家戶戶攏愛有的合桌佮童軍椅搬來門跤口的路邊，準備開始寫功課。低年級的囡仔若是拄著袂曉寫的注音符號，閣知影通參考印佇桌仔面頂的『ㄅㄆㄇ』；中年級的若看著貧惰想的計算題，嘛會使光明正大看仝款印佇桌面頂的九九乘法表，這塊聰明的合桌真正是阮彼个囡仔時代無法度放袂記得的má-tsih；高年級的囡仔兄、囡仔姊的功課有較困難，有時陣會互相討論。較貧惰學的，就會用糖仔餅抑是尪仔標來交換答案。彼時規條巷仔排甲齊齊齊的桌仔，大粒頭、細粒頭，有的轉正爿，有的斡倒爿，有的覆低低，有的攑懸懸，遠遠看過去若親像加工區的生產線，逐家攏趕緊咧趁天色猶未暗，拍拚完成家己的作業。

　　若是功課寫了矣，逐家就開始那摸橐袋仔內底的銀角仔，那對巷仔口的𥴊仔店衝去。𥴊仔店的頭家娘逐家攏叫伊「錢嫂仔」。見擺看著阮這陣囡仔疕𤲍佇狹櫼櫼的店內，聽著khin-khin-khiang-khiang的銀角仔聲，伊攏喙笑目笑問阮欲買啥物？每一个囡仔目睭嘛褫甲大大蕊，看著店內誠濟款的四秀仔，閣有彼時上時行的抽鬮仔兼對獎品，大部份的囡仔攏會躊躇一下才決定欲買的物件，有時嘛會交換分享家己手內的糖仔餅佮𨑨迌物仔。

　　若是時間欲倚六點的時陣，規陣囡仔就若親像有經過訓練的部隊，逐家攏用走百米的速度傱轉去家己的厝，準備食飯配電視。這陣規條巷仔就不時放送出bàng-gà主題曲的音樂聲，定定嘛會使鼻著無仝口灶阿母手路菜的芳味。尤其是巷仔口彼支路燈著的時，若親像咧為這條充滿幸福的無尾巷點一葩圓滿的燈火。(TOP)

 

03夢想新公園　　謝慈愛

　　阮阿爸是靠氣力趁食的碼頭工人，厝裡頭喙濟，目睭一下擘金就愛開錢，經濟有較艱難。所致，阮囡仔時𨑨迌的範圍干焦學校佮附近的仙公廟爾爾。基隆有名的新公園佇阮囡仔人的心肝內，若像臺北城遐爾仔遙遠，攏向望有機會會當去踅踅看看咧。

　　國校三年的時，阮這班搝大索著頭名，老師歡喜甲講欲𤆬阮去遠足，地點拄好是阮數念誠久的新公園。連紲幾若工阮一直纏阿母：「緊共阮攢四秀仔啦！」搪著熟似人就喙笑目笑大聲放送：「後禮拜阮欲去新公園𨑨迌喔！」

　　等久原仔會到啦，彼工阮紮一鈷白滾水、一粒阿母牌的魚酥飯丸、幾粒仔鹹梅仔、金含仔糖和一包蠶豆，遮的攏是彼當時會予囡仔流喙瀾的四秀仔。穿老師規定的白衫佮烏色的百襇裙，規班若粟鳥仔仝款噭噭叫，相挨相𤲍坐公車，lok-sōng-lok-sōng綴老師來到鬧熱的街市！

　　新公園佇信二路的頂懸，有幾若條山路通起落，老師安排逐家對倒手爿彼條躼躼長的坎仔開始。好玄的小朋友頭攑懸懸，哇！遮爾仔崎！到頂懸定著大粒汗細粒汗，干焦想就忝頭矣。毋過，有媠媠的景緻佮好食、好耍的咧唌人，逐家攏對目標一直衝起去，輸人毋輸陣啦！

　　公園頂有真濟大大欉，青ling-ling的樹仔、五花十色的花草，阿公、阿媽一陣一陣咧開講拍抐涼，少年囡仔咧拍球。樹跤kha-lá-óo-khe傳出響亮的歌聲，跳舞的、拍拳的、散步的攏總有。涼亭仔邊有囡仔上愛耍的幌韆鞦、趨流籠、踅地球。規陣囡仔疕歡喜甲傱來走去、懸低。看袂盡的風景，食袂𤺪的四秀仔，耍袂煞的遊樂設施，形成一幅歡樂的畫面，予阮這陣庄跤倯大開眼界！免偌久每一个同學就攏流汗糝滴，喙䫌紅牙紅牙。這改的遠足，逐家攏耍甲真歡喜。等到日頭欲落山矣，才沓沓仔徙開跤步佮新公園擛手。

　　新公園毋知底時改名號做中正公園，新點點的招牌佇懸懸的石坎邊，坎仔兩爿的指甲花開甲豔豔豔，桂花的芳味嘛隨風四界送，好親像咧招呼過路的人客：「歡迎逐家起來散步喔！」(TOP)

 

 

04牆圍內的囡仔　　艾(Ngāi)茵

　　看別人寫成長的過程，攏予人呵咾甲會觸舌，毋是足乖，真𠢕讀冊，考試攏考頭名、做班長，若無，就是齣頭真濟，誠𠢕創治人，予老師頭殼𢯾咧燒。啊若我就無仝矣，我是一个無味無素的普通囡仔，佇一陣生份人內底，別人袂去注意著我。讀冊的時，我毋捌做過班長，毋捌考過第一名，嘛袂予老師點油做記號。想欲寫我細漢的代誌，煞毋知欲寫啥。

　　做囡仔的時，阮阿爸和阿母佇市仔做生理，阿姊攏咧讀冊，無閒通顧我，就放牛食草，規工出在我去外口賴賴趖，四界lōng-liú-lian。人講：「戇雞母孵鴨孫，戇外媽疼外孫。」外媽就叫我去遐，較袂規工佇外口拋拋走，就按呢我攏會去遐守規工。

　　外公兜是大家口仔，我有六个阿舅、阿妗，一个阿姨，攏蹛做伙，算算咧有五、六十人。佮我頂下歲的表的，就有十外个，阮攏做伙寫宿題、扮公伙仔、𨑨迌。彼當時，真時行摃野球，下晡時仔，宿題寫煞，若講欲拍野球，走出來大埕欲耍的就有夠兩隊矣。跤手慢鈍的，愛抽鬮仔做候補，所以阮攏毋捌出去外口和厝邊的囡仔耍。外公共孫顧足牢，一時仔無看著人，外公就會隨去揣人。若予伊揣無，閣講袂出啥物理路出來，皮就愛繃較絚咧。逐家攏毋敢出去傷久，欲出去嘛會交代清楚。

　　讀大學，歇熱的時，同學攏咧做散工，我嘛綴人去做，佇附近的藥廠允一个包裝的缺。仝批的學生仔有六、七个，做陣開講的時陣，有一个蹛佇外公兜對面的少年家仔，開喙就講：「我捌你，你是牆圍仔內的囡仔。」

　　「牆圍仔內的囡仔」，我頭一擺聽著這个講法，毋知影外口的人是按呢咧看阮。伊講攏真想欲佮阮做伙𨑨迌，特別是拍野球，定定攏無夠人。反顛倒阮是逐工耍甲閣有人愛做候補，做候補的人嘛袂當走出去耍，嘛無機會通熟似外口遮的人。就按呢攏目睭金金徛佇牆圍外看阮咧拍野球。這是一種真無仝款的感覺，原來阮嘛是別人欣羨的。(TOP)

 

05蝴蝶公主　　王秀容

　　我細漢蹛高雄市籬仔內，毋是市區，對學校轉來厝裡有兩條路。若行大路，店濟、車濟，青紅燈愛緊過；若行小路，有圳溝、有水田，會當慢慢仔行、寬寬仔耍。免講，攏嘛揀小路較趣味。到今想著行佇春天的田路邊，心肝穎仔猶是笑甲糖甘蜜甜。

　　阮放學攏嘛笑頭笑面，穿白色的siat-tsuh，藍色的吊帶裙，若像佇天頂飛的白雲。阮戴柑仔色的碗公帽仔，袂輸路邊綴春天的風，搖來搖去的花蕊。查埔囡仔早就共鞋仔褪落來，鞋帶結做伙吊佇頷頸，蹽圳溝咧耍水。阮查某的較毋敢，就佇邊仔看，連鞭喝講欲共爸母投，連鞭著愛細膩，莫去予潑著水。嚇欲共阮潑予澹，阮就緊走。走去佗位？走去逐飛啊飛的蝴蝶。

　　我上愛佇春天的田岸邊逐蝴蝶。飛佇空中若咧跳舞，停佇花蕊若公主穿媠媠咧看你。我捌共手伸出來迎接，有一兩擺仔會乖乖仔飛來我的手裡。我嘛捌予同學看著停佇我的帽仔頂，可能蝴蝶嘛知影我袂害。有當時仔我會共雙手展開學飛，我這隻假蝴蝶飛袂懸，只好攑頭看佇空中共我擛手講：「後擺才閣陪你耍！」

　　我都市囡仔捌的蟲豸無幾款，除了蝴蝶，賰的攏若像冤仇人仝款。我用手拍蠓仔、挼狗蟻，提樹奶擗胡蠅，捎淺拖仔摃虼蚻，唌金龜縛伊的跤予踅圓箍仔飛，掠蟋蟀仔予相觸、相咬，掠火金蛄轉來關蠓罩，先拈田嬰才共放予飛！遮的恐怖事件，攏予我心驚驚，嘛足對不起，誠後悔啦！細漢人咧時行飼娘仔，講欲予變蛾仔，我嘛是毋敢。我干焦佮意蝴蝶若公主的恬靜、優雅。

　　到今，逐冬三月、四月，涼冷仔涼冷的春風吹來，樹仔頂發新穎，春天溫柔的日頭光，對樹椏縫掖落來，花蕊、草仔攏笑笑仔媠，蝴蝶攏守信用，會出來跳舞。雖然我細漢的田岸小路、圳溝已經變大樓，做伙放學的囡仔伴嘛已經變老，毋過，天頂的白雲，猶原綴春風咧飛，春天的花蕊，猶原伴春光咧笑。蝴蝶公主一直蹛佇我永遠春天的城堡，佮我𨑨迌！(TOP)

 

06歇睏日　　蔡瀚儀

　　歇睏日阿爸定會𤆬阮四界去𨑨迌，這擺阮欲去看水筆仔。水筆仔生長佇淡水河的出海口，這是一種真特別的樹仔。阮小弟阿明上歡喜，因為自然課拄咧教水筆仔的生態，伊足想欲去看到底水筆仔是按怎咧發穎生湠？雖然捌聽人講過，毋過嘛是猶捎無摠頭，不如親身去看較實在。

　　阮規家坐捷運去到紅樹林站，來參觀生態館的人誠濟。先看水筆仔生態的影片，予逐家對水筆仔有基本的認捌，導覽才閣𤆬阮去生態保護園區參觀。哇！看過去規片攏是水筆仔，有一條柴枋釘的步道，彎彎斡斡順河邊行過去，沿路雙爿的水筆仔發甲誠茂。樹仔頂一枝一枝親像毛筆的水筆仔囝生誠濟，有的落落來拄好插咧爛塗裡，就生根發葉佇遐大欉，若落佇水面的就綴流水流出去。

　　流水逐工會來來去去，佇水面的水筆仔囝就會綴四界去，踅去河岸邊，踅到溪仔墘。佇遐咧歇睏的時，毛蟹看著講：「蹛咧啦！遮有誠濟朋友佮你做伴，你才袂孤單。」水筆仔囝誠歡喜就佇遐蹛，就按呢一代一代生湠落去，無偌久就成做一片紅樹林。洘流的時，大管仙、海和尚、海虼蚻攏出來賴賴趖。兩尾花鮡咧相偃，共尻脊骿的旗仔褫甲若親像船帆，樹林跤鬧熱滾滾。上趣味的就是兩隻攑白扇仔咧相戰，共大管跤攑懸懸咧相嚇驚，有夠風神。導覽講，拍輸的有時陣會共大管跤擲咧做伊旋。伊閣問講：「減一肢管無武器，後擺欲按怎佮人相戰？」小弟隨攑手應講：「伊會閣發一肢仝款的大管跤。」導覽賞伊一張攑白扇仔的貼紙，逐家閣共拍噗仔呵咾。

　　白翎鷥佮海鳥佇海埔仔咧討食；毛蟹佇塗空濆出濆入真無閒，跤手真猛掠。阿爸講：「跤手若慢鈍連鞭就予海鳥捅去！」

　　阿母講：「歇睏日來紅樹林看毛蟹挖塗空、看花鮡佮石貼仔有啥無仝款？加捌一寡常識才袂讀死冊。」欲暗仔海邊全紅霞，一陣一陣的海風吹來，有一種魚仔的臭臊味。阮坐佇捷運頂懸，窗仔外的水筆仔咧共阮擛手，若咧叫阮有閒才閣來𨑨迌。 (TOP)

 

07磅麥仔芳　　黃美銀

　　進前見若拄著拜一早起欲去學校，攏會足𠢕拖沙，就愛等到時間倚倚倚才會甘願出門。毋過，彼工的禮拜一，我透早就攢好咧等阿母。伊閣講︰「敢是今仔日天欲落紅雨？啊無，哪會遮反常。」

　　連普通時仔上慼的摒掃鐘仔聲，聽著嘛敢若袂蓋歹聽。塗跤猶原是落遐爾濟的葉仔咧等阮來掃，講嘛奇怪，逐家今仔日的效率特別懸，真緊就掃甲清清氣氣。

　　無偌久，就看著一台發財仔車，對遠遠的所在，駛過去停佇學校運動埕邊仔彼欉苦楝仔樹跤，我的心嘛綴咧飛過去矣。因為車頂載的家私會當變出阮欲食的磅麥仔芳。欲提來磅的麥仔，攏是阮學校的老師和學生囡仔親手種的。

　　會記得欲掖種的時，阿公驚阮共掖的種子踏踏死，愛阮學那行那掖，感覺真好耍。收成的時，阮有學「拾穗(si̍p-suī) 」彼幅名畫，綴佇割麥仔機後面，向咧抾麥仔穗。會按呢做，除了欲體會彼種感覺，嘛向望另工若是咧畫圖的時，會當畫了較有感情。雖然阮毋是抾拾，毋過老師會提抾起來的麥仔穗，教阮做一寡仔媠媠閣有意義的物件，嘛算是一兼二顧。

　　麥仔總算是收成矣，阮學校種的這三坵，是遮附近上慢收成的，足濟厝鳥仔因為無當討食，攏飛對遮來捅。無論是學尪仔冊內面做稻草人，抑是掛光碟片反光欲共嚇驚，攏無蓋有效。蹛學校邊的阿公看毋是勢，驚阮猶未收成，麥仔就攏飼鳥仔去矣，趁歇睏日阮無上課，專工去買炮仔共嚇驚。收成了後的麥仔，曝佇籃球場邊仔，老師有教阮按怎用耙柫來反麥仔。日頭猛，耙柫重，彼時才真正體會著「一粒米，百粒汗」的道理。

　　看著欲磅的麥仔佇桶仔內滾絞，聽著頭家歕觱仔的聲，就知影欲磅矣，逐家緊共耳空掩起來。一下磅好勢，麥芽膏攪攪咧，研平切做一塊一塊，阮就排隊去頭前，一人一塊提來食。

　　一喙一喙沓沓仔哺，彼種食佇喙內小可仔甜甜閣淡薄仔鹹鹹的芳味，我永遠會記得。除了喙內，就連心肝頭嘛是彼款甜甜的滋味。(TOP)

 

08巧豬　　沈瑩玲

　　阮是可愛的阿豬，生做古錐閣聰明，顧厝是我的穡頭，司奶是我上𠢕的本等。講到遮，相信逐家攏知影我是啥人矣。雖然我叫阿豬，毋過我毋是豬，因為細漢四界流浪，後來予管理員抾來做公豬予逐家飼，所以我號做阿豬。我有牧羊犬的巧氣、土狗仔扭掠的跤手和規身軀軟㽎㽎的毛草，真正是人看人佮意，無共我摸攏會睏袂去！

　　社區內有一个共我惜命命的阿伯，逐工透早七點攏會佮我佇地下室約會。享受腥臊的早頓了後，我就送伊去上班。有一擺，伊共朋友對美國提轉來欲送我的四秀仔㧣予我食。我一下鼻，哎喲！烘甲𠕇硞硞的豬耳仔，是欲叫我這个老歲仔的牙槽齧予歪去喔！我毋食，伊就一直㧣予我，㧣甲實在是袂忍得矣，我頭越咧就走。想袂到阿伯氣甲罵我是好命狗、毋知好歹，就氣掣掣去上班矣！

　　自按呢我就去樓頂鬥顧厝、佮逐家跋感情，嘛袂癮去食彼塊四秀仔。阿伯轉來看一下氣甲！這聲真正代誌大條矣，雖然公寓來來去去的人真濟，毋過真心疼惜我的人無幾个。阿伯若毋插我，從今以後我腥臊的早頓就烏有去矣！翻轉工，我早早就去等候阿伯。看著伊，我尾溜搖咧趕緊走去共司奶。毋過伊煞車駛咧做伊走，害我規工鬱卒佇心內。

　　隔轉工，阿姆佮阿伯做伙落來，我的尾溜是搖甲強欲落去。阿伯猶是毋插我，阿姆就跍落來提彼塊豬耳仔講：「哎喲！這烘甲𠕇硞硞是欲叫伊按怎食啦！」我聽一下心花開，總算有人了解我的心聲矣。阿伯就番講:「是按怎人美國狗有才調食，你這隻老狗就是毋願共我鼻芳一下？」車門關咧就做伊出門矣，害我心肝穎仔嚓一下，就閣跋落去無底深坑。了後我起慼心，共豬耳仔咬起來齧看覓。想袂到伊沐著溼氣已經變較軟略矣，我就開始沓沓仔哺，真正是愈哺愈芳，愈哺愈紲喙。阿姆看了真歡喜，就敲手機仔予阿伯。阿伯講：「算伊巧，目睭有漿泔，知影好落軟，若無，我就欲共伊放生矣。真正有巧，飼伊無了，哈哈哈……。」(TOP)