2015
07021806104 年度全國語文競賽-閩南語朗讀文章 (社會組)
01 大家．新婦 林美麗
02 毋甘 韓滿
03 望海 林晏¹如
04 懺悔 陳素經
05 人若食老 陳憲國
06 做工少年時 林淑期
07 我又閣夢著阿母矣 黃文俊
08 爸母疼囝長流水，囝想爸母樹尾風 江澄樹
09 板橋查某純情曲 王秀容
10 燒酒落喉，人全齣頭 張逸嫻
11 偝巾 廖淑鳳
12 一束鮮花 陳昭蓉
=======================================
護士建議先倩二十四點鐘的特別護士來共伊顧，因為病人猶無法度家己食物件，親像洗盪、揉身軀、掠龍、拍痰、換尿苴仔，攏是真專業的工課。
兩個月了後，俊生仔兩兄弟仔參詳過矣，看老母是欲送去安養院予專門的人來照顧，抑是欲予序大人輪伙鬮？
俊明仔干焦知影趁錢，伊掠準病人會當精神就是好矣，無去想著老母這馬是佇嚨喉切一个空喙，鬥『hòo-suh』管通入去肺管才有法度喘氣，無法度家己哺物件，到今愛閣用鼻胃管來飼牛奶。倩特別護士一日兩千，一個月愛六萬，哪有遐濟錢來倩？月英仔是誠𠢕拍算的人，既然罔腰仔出加護病房矣，會使家己顧就家己顧，橫直伊也無咧食頭路。看特別護士照顧大家嘛無啥物特別的工夫，毋甘閣開冤枉錢，就佮大伯參詳，先予伊顧一個月看覓。想袂到美桃仔翁仔某對醫生遐提著『巴氏量表』，就去揣中人登記申請外勞。一個月到，欲過鬮的時，外勞仔就會來到臺灣矣。
一點仔都無共伊存¹一下，月英仔感覺家己若戇人咧。大的講：「老歲仔閣有誠濟錢，暫時毋免用著咱的私奇。咱閣有家庭、有囡仔欲飼。先共老歲仔的定期單解約，用伊的錢倩人來共伊顧，是合理的。啊咱嘛毋通因為老歲仔按呢，生活就來受影響。中風的病人，長誠長、短誠短。逐个人總是愛用平常心來過日子。」
這寡仔定期單，罔腰仔本底攏寄佇月英仔遐。聽大的按呢講，月英仔無第二句話，攏提出來交予大伯。伊自細漢佇清白的家庭大漢，是一个袂痟貪的人，總是知影「欲食胡蠅家己欱²」的道理。
暗頭仔，天頂規片攏是紅霞³，月英仔徛佇涼台前，目尾捽對俊生仔翁仔某彼台當欲離開的烏頭仔車遐去。看這个範勢，自開始就無拍算欲家己顧的款，按呢我是咧做癮頭的喔？月英仔親像予人搧著喙䫌仝款。想著家己共人顧甲歡喜甲，結果去到高雄，所有的復健工課攏無咧做。原來大伯的孝心是咧做予人看的。早若知影，就規氣共老的送去安養院就好，哪著倩外勞？結果外口的人攏呵咾俊生仔有情有義，閣欣羨罔腰仔飼遮的囝，無共冊讀到尻脊骿去，誠值！
¹存(tshûn)
²欱(hop/hap)
³紅霞 (âng-hê)
(TOP)
若準講人生親像舞台，我向望家己是一个笑詼劇的丑仔，會當共快樂帶予別人，嘛會當共歡喜囥佇心內；若準講人生是一本冊，我向望家己是一本內容精彩的故事冊，逐家看了會想欲閣看。
阮兜的囡仔真濟，阿爸干焦是一个小小的公務人員，逐個月的月俸無法度通飼遐濟支喙。阿爸下班了後，就去巷仔口排擔仔――削甘蔗、破西瓜，加減仔趁寡錢；阿母嘛佇厝跤邊飼雞仔、鴨仔佮豬仔；阿姊透早就去市場，抾菜葉仔轉來飼雞仔鴨仔。雖然阮規家伙仔攏誠無閒，毋過嘛過甲誠快樂。
阮兜出去就是嘉義上蓋有名的林森路，有一个杉仔行的頭家來阮兜行幾若擺。伊共阮爸母講：「恁兜囡仔遐爾濟，阿梅也誠有我的緣，若予我做囝，我會好好仔共伊栽培，後日仔定著會有出脫。恁兩个做序大人的嘛毋免做甲遐爾仔忝！」阮老爸應講：「囡仔欲來綴我食穿，我若有一喙水通啉，囡仔上無都有一碗番薯箍湯通啉。雖然無魚魚肉肉通食，毋過，絕對袂去予枵著、寒著。毋管我的囡仔有偌濟，我攏袂共囡仔分予別人做囝啦！」
阮細漢的時，阿爸為著阮這陣囡仔，逐工做甲活欲忝死，毋過，伊上大的娛樂就是聽『la-jí-ooh』、看布袋戲。彼陣我誠愛讀冊，所以阿爸上疼我。伊攏會𤆬阮去看布袋戲，史艷文、藏鏡人……遮的人，予阮囡仔時陣的日子過甲誠心適。逐暗規家伙仔攏去睏矣，阿爸就提『la-jí-ooh』去柴間仔聽。我會隨綴過去共阿爸司奶，佮阿爸做伙聽劉備三請孔明、孫臏¹鬥龐涓²……攏是阿爸上愛聽的戲齣。
阮大漢的時，踏入社會食頭路囉！有一工落雨，一个幔雨幔的菁仔欉，青磅白磅傱入來阮辦公室。阮誠受氣共伊講：「毋管你有啥物代誌，先出去共雨幔褪落來才閣講。」後來，這个人定定來阮公司。伊生做懸懸仔閣大箍大箍，毋但誠愛講笑，有當時仔嘛會紮物仔來予阮食。有一擺歇睏日，伊𤆬阮去山頂𨑨迌，閣有紮阮上愛食的葡萄。伊毋但共葡萄洗甲誠清氣，閣共葡萄拭予焦才予阮食，實在足感心的。到山頂的時，伊沿路行沿路呼噓仔，阮沿路行沿路抾楓仔葉。規路那講那笑，予阮規工攏誠快樂。
¹孫臏(Sun Pin)
²龐涓(Pâng Kuan)
(TOP)
阿婆的大官佇日本時代，予日本警察叫去造路。拄仔好總督巡查的時經過遐，雄雄有一尾毒蛇趖出來，險險仔咬著總督。阿婆的大官為著欲救總督大人，去予毒蛇咬著，煞犧牲家己的性命。因為按呢，日本總督就收阿婆的翁婿做契囝。毋過「人無千日好，花無百日紅」，日本總督無偌久就[予人]²調轉去日本。雖然有留一寡仔財物予阿婆翁仔某，毋過後來阿婆的翁婿破病，錢攏開了了。落尾也是無法度共伊寶貴的性命救倒轉來。阿婆無法度，只好共唯一的祖產——果子園提去賣，才有通埋葬翁婿。咧賣地的時，阿婆有佮買主參詳，予伊會當蹛踮果子園內底的厝，到伊死為止。
因為厝裡足散，阿婆常在捒奶母車仔，抾歹銅舊錫咧賣；嘛有收厝內有幼囡仔的尿苴仔轉去洗，洗好曝焦才閣提轉去佮主人算工錢。秀萍佮小弟阿義仔細漢的時，尿苴仔就是阿婆洗的。阿婆有生三个後生佮一个查某囝，因為厝裡散赤，三个後生攏去予人招。唯一的查某囝八歲就分予人做新婦仔。啥人知影伊嫁毋著人，翁共伊放捒去愛別人，生一个查某孫仔閣𤆬轉來予阿婆飼。查某囝無面子閣蹛踮庄仔內，走去外地。一去就攏無消無息。
秀萍的老爸故事猶未講煞，秀萍的小弟阿義仔佮某心彤就轉來矣。轉來了後，秀萍就做伙去樓頂，共囡仔洗身軀、洗衫、款內底。阿婆的故事就另日仔才閣繼續聽落去。
秀萍徛佇二樓的露台披衫，拄仔好會當看著阿婆的厝。伊的厝是杉仔枋釘的，看袂著厝內的情形，干焦知影內底一定真狹，兩坪大的跤兜。杉仔厝頭前有紅磚仔起的灶，邊仔疊一寡破好的柴，灶頂有囥一个鼎。看起來阿婆毋捌用過瓦斯爐，攏是用柴咧煮飯、燃燒水的款。杉仔厝的外口就是果子園。園內有種檨仔、弓蕉、蓮霧佮龍眼。秀萍自細漢就蹛庄跤，干焦遠遠看葉仔就知影園仔內有種啥物果子。今仔日聽老爸按呢講，伊才知影，原來園仔內種遐爾濟果子攏毋是阿婆的。猶閣有，樹仔跤飼的雞仔、鴨仔佮鵝仔嘛攏是別人的。果子園門口停的彼台車已經駛離開矣。秀萍共衫披好無隨入去，徛佇露台一直咧想老爸所講的故事。
¹晏 (àn)
２[予人] (hőng)
(TOP)
我實在真毋願行上這條不歸路。翁猶緣投，囝猶細漢，爸母猶佇咧，這欲叫我按怎行會開跤？七爺八爺請你莫相趕，牛頭馬面你莫嚇驚。喔！耶穌你嘛來矣。我知影天國近矣！平常時我信你神愛世間人，啊毋過這時陣看著你，我是驚甲咇咇掣。我哪會舞甲這款地步咧？
人講第三查某囝食命，敢有影？有啦！傳說中的水雞土仔某就是。心肝好、腹腸闊、袂計較，天公嘛來鬥相共，尾仔過著富裕的好日子。西洋的囡仔古《三姊妹》嘛是。大姊嫁予共國王做『pháng』的師傅；二姊嫁予國王的總舖師，逐工食腥臊；第三的嫁予國王，生媠噹噹的囡仔，過快樂的日子。現實中阮大嫂嘛袂䆀。人巧、讀冊順利，考著師專，頭路便便，閣嫁著好翁，食好做輕可，好命inn-inn。做老師二十外冬，會使退休矣，閣去讀碩士，是上新的臺文所，研究臺語喔！伊實在是我的好模範。平平是第三查某囝，哪會天差咧地？這就愛怪我一步錯、步步錯啦！
彼年師專考無牢，袂曉計畫去補習一冬才閣考，堅持欲讀新娘學校――家專的幼兒保育系。雖然厝裡散赤，爸母疼我，予我開大錢。畢業揣頭路，才知代誌大條矣！固定的頭路歹揣；做囡仔頭王月給低；做國小代課老師雖然逐年愛考試。毋過放假固定，薪水袂䆀，自按呢做幾若年。這是我無煩無惱、無憂無愁的查某囡仔時代。啊！實在足懷念，足懷念的。唯一的致命傷是無在額，予人看輕。
「男大當婚，女大當嫁」，我去煞¹著同事紹介的「科技新貴」查埔朋友。我誠欣賞伊的電腦功力，誠佮意伊的緣投好看。除了遊山玩水、開講踅街以外，逐擺伊若來，阮攏關佇房間仔內，嗤舞嗤呲袂厭𤺪。爸母攏講：「按呢毋好啦！」「按呢傳出去足歹聽。」
人講：「媠䆀無比止，愛著較慘死。」親情朋友、兄弟姊妹並無贊同，干焦我目睭去予蜊仔肉糊著，堅持欲綴時行――自由戀愛。嫁了才知苦。大家真勥跤，先生閣真有孝。毋過我講話無人信篤，佇厝裡無地位。因為我無穩定的工課，結婚前的頭路，大家叫我辭辭咧，翁仔某同齊拍拚電腦事業。
¹煞(sannh)
(TOP)
1998年，踮新竹舉辦第一屆全國鄉土語言競賽的彼當陣，電視頂有一句真流傳的唸謠講「人若食老：哈唏流目屎，放尿厚尿滓，放屁兼滲屎。」阮幾个去遐做評審的人，想講這句話若親像無蓋雅氣，就逐个做伙激頭腦，想出另外一句較好聽的，講：「人若食老，坐咧直哈唏，倒咧睏袂去，見講講過去，隨講隨袂記。」這句話真正有影較好聽，嘛誠實在，就代替原來彼句話，一直流行到今。
有人問講：「人生70才開始，啊是底當時才變老？」別人就應伊講：「人若講你猶閣少年咧，你就開始變老矣。」伊紲落來閣問講：「按呢喔！啊你看我，我按怎？」彼个人小想一下，閣掠伊看一下，就共伊應講：「你喔！袂啦、袂啦！你猶閣少年咧。」
有一个機會，捌去「中央研究院」參加每個月的「智識饗宴」，順紲聽專家演講。猶會記得彼暗的演講者是鄭泰安先生。伊是英國精神科的醫學博士閣兼科學博士。彼暗伊的講題是「媒體佮自殺」。會記得是講起有關『倪敏然』自殺的新聞報導，因為報傷濟、報傷詳細，真濟人會去模仿，煞引起自殺率的提懸。伊講這是毋著的媒體現象，加製造真濟的社會問題。其中有提起講：人會去自殺可能就是著著「憂鬱症」的症頭。有人問講：「啥貨是憂鬱症？」鄭博士特別用臺語應講：「若是：袂食、袂睏、袂做，無記持閣無元氣，可能就是食老著著憂鬱症矣。」在座的袂少人，聽了就開始喙內一直唸。毋過我感覺真少人唸會齊全。可能佮年歲有關係的款。
嘛有人講食老的人有較厚話淡薄仔，喙若開就講袂煞。囝兒序細聽久嘛𤺪，有時會共伊應喙應舌；啊若是外人就歹勢按呢。所以若有機會通講話就講毋知通煞。想講至少嘛免像歐美國家的老人，著愛提錢倩人來聽伊講話。
有一位網友可能感覺講我也無偌少年矣，就『e』一个『戒老錄』予我。自頭到尾數十條，叫我每一工看兩遍，絕對有幫贊。看起來每一條攏誠有道理，毋過我想講有兩項若記會牢閣照按呢做，可能就加減有幫助：頭一項就是「毋通想講別人替你做，是應該的代誌，因為老，並毋是就有權利要求別人替你做代誌。」第二項就是「毋通閒閒無代誌做，就欲管閒仔事，抑是評論別人。」向望逐家品好勢，照品照行。
(TOP)
若講起著做工，我就想起少年時彼段做臨時工的日子。細漢的時，厝裡誠散赤，為著欲趁家己的學費，毋管歇寒、歇熱，我攏愛認份，去做工鬥趁錢。毋過，1980年代的臨時工，毋是佇七𥴊仔店吹冷氣，嘛毋是佇十字路口分傳單。我是綴發財仔車大街小巷去賣麻糍，甚至閣去梨山做苦工、挽梨仔。做工少年時，有真濟鹹酸苦澀的滋味，嘛有誠濟甜蜜的記持。有當時仔做夢閣會來夢著。
「清水屋的麻糍來囉！好食的麻糍來囉！」我佮一个查某伴，坐佇發財仔車面頂，沿路包沿路賣。
「我欲二十箍塗豆的！」「我欲三十箍紅豆仔的！」阮兩个那捻麻糍、包餡、滒塗豆麩、烏麻仔粉，閣愛那收錢、找錢，兩雙手無一時閒。坐佇低低的椅頭仔，蹛狹狹的車頂屈規工，一直到麻糍賣煞，就會當領著現工的工資二仔五。這是我師專二年的歇熱，頭一个做工的經驗。
後來，聽講梨山工資懸，就孤一个人行李捾咧，對臺南坐火車到臺中，才閣對臺中盤客運到梨山。坐佇火車內，看著窗仔外赤焱焱的日頭光佇海面跳曼波。這是佇嘉南平原大漢的我，第一擺遮爾近看海。尤其是佇炎熱的八月天，一望無際閃閃爍爍的大海。離鄉的我毋敢有傷濟鄉愁，干焦向望會當加趁寡工錢，共厝裡相添。
佇梨山的日子，生活真簡單，天光就作穡，日頭落山才歇睏。查某工負責鉸梨仔較輕可的工課，查埔工就做擔梨仔較粗重的穡頭。鉸落來的梨仔照品種、大細分開包裝。若生傷懸鉸袂著，蒂頭掣無去的梨仔就hőng拍落來，予阮這陣佇山頂無四秀仔通享受的工人做啖糝。
因為一水一水的梨仔季無長，加上三十冬前生活普遍歹過，會記得彼陣所蹛的工寮真正是「有省錢」的。所有的查某工𤲍一頂總舖，根本都無冗剩所在通翻身。工人濟，浴間干焦一間，姑不將一擺輪四个人入去。衫就袚佇索仔頂，一人徛一角，趕緊用冷水沖沖咧就準過，兩蕊目睭攏毋敢烏白相。到今想起來猶閣會歹勢呢！便所就搭佇外口的溝仔頂，凊彩用枋仔圍咧爾！暝時無議量，干焦會當攑手電仔炤暗眠摸的山路，行去山跤唯一的𥴊仔店外口，排隊敲唯一的公用電話報平安。
雖然做工少年時的沓沓滴滴，隨歲月的流轉已經漸漸遙遠，毋過彼種佇困境裡鍛鍊出來堅強的意志，煞成做我成長的養分，豐富我的人生。
(TOP)
「阿母！按呢有較快活無？」我沓沓仔對阿母腫甲若麵龜的跤頭趺挲到跤底。阿母煞完全無反應！斟酌共伊摸，身軀猶閣有拉圇仔燒，毋過阿母按怎攏無聲無說？「阿母！你哪攏毋講話？」當欲出力共阿母搖予精神，伊煞化做一陣煙消失甲無影無跡。才知影：我又閣夢著阿母矣！
阮阿母伊一世人攏真細膩，事事項項攏無愛麻煩別人。甚至連伊的人生行到上尾站的時陣，伊嘛仝款無愛麻煩阮遮的序細。毋甘阮南北二路、奔波走傱來共照顧，煞佇短短兩個月內佮阮來告別，予人愈想愈毋甘！
阿母出世佇日本人統治咱臺灣的尾期。因為拄著戰爭、生活困難，自細漢就予人做新婦仔。伊嘛真早就知影家己的身世，所以養成萬事吞忍、堅強拍拚的個性。阿母嫁予阮阿爸無偌久，翁婿就調去金門做兵，賰伊一个人愛照顧目睭青盲、欲九十歲的阿媽，閣愛侍候大家官、晟養序細。彼種艱苦，恐驚無幾个人會當了解！阿爸退伍了後，囡仔一个一个生、工課換過幾若十个。阮阿母嘛是目屎吞腹內，漸漸共囡仔晟予大漢。
後來，因為佇庄跤實在趁無食，阮規家伙仔搬去繁華的臺北，佇菜市仔邊排擔仔賣臭豆腐佮雞絲麵。阮爸母共路邊擔仔的小生理當做大事業咧做，材料攏愛真清氣相，臭豆腐愛洗予清氣、泡菜愛家己豉、雞絲麵愛買幼麵線來糋，連豆油膏嘛愛煮過，講按呢才袂死鹹！遮的工課有的會分予阮兄弟仔來做，毋過大部分攏是阿母一个人承擔落來。日時愛款材料，暗時閣愛鬥顧生理。半暝仔收擔，透早閣攢早頓予阮食。有時陣忝甲無法度煮，才提銀角仔予阮去外口買。這種長期無眠閣操勞的日子，早就共阿母的身體操甲規組害了了矣！
遮濟冬來，阮阿母常在講伊的身體就是一座藥櫥仔。古早人講：「藥仔食傷濟就是毒。」阮已經慣勢阿母不時咧破病。這擺伊咧喝艱苦，攏共當做是痠疼的老症頭咧醫，煞毋知歹物仔已經佇身軀底湠甲袂收煞矣。這攏是阮的不孝！
人講:「爸母疼囝長流水」，佇阿母病情愈來愈重的時，阮兄妹仔輪流轉來共伊顧。伊猶原咧踅踅唸：「…定定請假，敢袂影響恁的工課？…駛車佇高速公路拋拋走，著愛注意安全！…我的乖孫，我袂赴看大漢，恁著愛好好仔共晟嘿！」每一句攏充滿著序大的關心。這馬，阿母已經離開阮矣，阮會好好仔做人、服侍老爸、晟養序細。向望伊會當心無掛礙，無煩無惱！
(TOP)
這句俗語真簡單，就是爸母疼囝的心，若像溪流的水，隨時攏咧流振動，啊若囝想爸母，就若像樹尾的風，有時仔有，有時仔無。臺灣俗語是咱祖先留落來寶貴的話句，會當留到這馬，定著有伊的道理佮智慧，會堪得用時間來共證明。
看現此時的爸母對囝的疼痛佮付出，袂輸早前的爸母。囡仔細漢紅紅幼幼，搦屎搦尿，驚伊寒、驚伊熱閣驚伊枵；若有辛苦病疼，三更半暝嘛著走醫生館；較大漢讀冊，驚伊綴人袂著，閣驚伊佮同學歹鬥陣，嘛驚伊交著歹朋友；紲落去，學校出業踏入社會，驚伊頭路無順序，交無男女朋友；閣來嫁翁娶某了，換煩惱翁某敢有和好；最後，囝煩惱無夠，換煩惱孫來鬥，這是一般做爸母的心聲。若是做囝的，想爸母就無遐齊勻；出外去讀冊抑是食頭路，三不五時仔敲電話轉來，做爸母的就歡喜甲喙笑目笑；若是出外讀冊，欠錢的時才敲電話轉來叫你匯錢，這嘛是真四常的代誌。所以你講這句「爸母疼囝長流水，囝想爸母樹尾風」，是毋是講了真鬥搭。
爸母疼囝的心，毋是囝想爸母會當比得，所以才有另外一句俗語講，「手抱孩兒，才知爸母時」，這就是咧教示咱的囝兒序細，毋通等到有一工，知影通感恩爸母的時，煞無機會、袂赴矣，按呢就會終身遺憾。所以做好代愛即時、愛隨時，有孝爸母嘛仝款，時間是袂等人的。
爸母疼囝是天性，濟濟大自然的現象嘛會當替咱解說。像咱定定看著竹仔欲死進前會開花，彼就是伊知影家己壽命該終矣，為著傳宗接代，不得已，用盡伊所有的氣力，來開花結子傳後代。種弓蕉的農民，會佇弓蕉收成了後，共老欉剉掉，當做新欉的肥底，就按呢一代傳過一代。閣像紅鰱魚會千辛萬苦，泅幾若千公里，嘛是為著欲生卵，生湠後代。閣有真濟蟲豸，佇交配了後，公的會成做母的的食物，所有的一切攏是為著後一代。
以上遮的現象攏是大自然的法則佮咱人定定搪著的，這就叫做世傳世，按呢伊的族群才會大葩尾。
(TOP)
板橋有無純情的古早歌，嘛有純情的現代歌。
古早的〈板橋查某〉，較有歲的人攏會曉唱，無嘛捌聽過。「火車火車就吱吱叫，五點十分就到板橋，板橋的查某是媠閣笑，緊來去賣某就來予伊招啊，來予伊招。」這條歌定定予查埔查某相諍相剾洗。攏是查某的先抗議：膨肚短命，無代無誌路裡看著媠姑娘仔，就喝欲某囝寄人飼？真正是良心予狗哺，死無天良的查埔，食人夠夠，無帶念某的顧翁顧囝、款前款後，顧大家無顧後頭。
莫受氣、莫受氣，毋是干焦查某的咧抗議，查埔的聽了嘛真厭氣，查埔人的面子卸無去？這个坐火車的豬哥無情無義無志氣，男子漢大丈夫變做足細漢的塗豆麩，佮某離緣換銀票無打緊，煞欲去予人招，祖公仔的字姓敢無欲惜？
一條遮古錐，小可仔激骨、滾耍笑的流行歌，想袂到會予查埔查某冤家相罵，喙脣皮拚輸贏。你若因為按呢，講伊是無好的歌，就毋著矣啦！彼个時代查某人無地位，無像現代的查某人講話較大聲，予人放捒退貨的是有聽過，毋過這條歌干焦是唱心適的爾爾。這个查埔人嘛是「看有食無干焦癮」，唱歌來消敨心內的鬱卒爾，厝裡有「煮飯的」、有「柴耙」、有「牽的」，毋敢啦！算來，伊猶是一个純情的查埔囝！
講著純情，敢一定是純愛情？現代的歌星蕭煌奇，唱一條〈板橋純情曲〉，「板橋的風啊繼續吹，吹過咱細漢對面彼片初戀地，一條黃昏的環河路，有咱輕聲的對話，有咱青春的表白……」。伊的歌聲本底就好聽、飽滇閣有性命、有元氣，若聽著這條歌，保證查埔查某無人會冤，攏嘛做伙學內底的青春男女輕聲細說，親像板橋的風微微仔吹，做伙聽板橋在地人，唱出對故鄉的依戀佮對早前生活的數念。查某的聽了無感動才奇；查埔的聽了嘛會呵咾唱歌的歌星。蕭煌奇無因為家己目睭失明煞來失志，顛倒用伊的才情拍拚所得著的金錢、名聲，為仝款青盲的人開一間『按一個讚』的店替人掠龍，予遮的目睭失光明的人，生活、前途有倚靠。
板橋處處有純情，有古錐活跳的愛情，有對艱苦人的牽成。
(TOP)
「有緣，無緣，逐家來做伙，燒酒啉一杯，予焦啦！予焦啦！……」、「我無醉我無醉無醉，請你毋免同情我，酒若落喉疼入心肝……」這兩條歌，歌詞內底唱出咱臺灣人誠特殊的啉酒佮拚酒文化。
現代人便若請人客，就會鼓吹逐家啉燒酒來熱場，而且欲啉一定愛展氣魄，酒杯捀咧，乾杯啉予焦，在場算我上勇跤，袂使予人看做是腌里腌臢！
佇新聞報導當中，予我印象上深的，就是啉燒酒駛車，發生事故的現場。受害者的家屬，佇遐喝天喝地，哭甲規身軀軟膏膏，向望伊的親人會當緊活起來。毋過彼个啉燒酒駛車的人，雖然已經對別人的家庭，造成無法度彌補的傷害，猶閣gín戇gín戇、馬西馬西，攏毋知影家己舞的是啥物齣頭。
政府一直咧宣導「啉酒毋通駛車，駛車毋通啉酒」，毋過猶是有真濟人攏無遵守。根據公路交通事故的統計，啉酒車禍佔所有車禍的八成半。特別愛提醒愛啉燒酒的朋友，啉酒駛車是無好結果的。欲啉酒一定愛想予清楚，才袂時到毋但害著家己，閣害著別人。
燒酒啉傷濟，頭殼會袂清楚，反應慢、跤手無法度控制，失去判斷能力，跤步徛袂在，目睭霧霧。有人會變甲誠厚話，毋過講著話是三講四重耽，甚至會佮人冤家相拍、攑刀相刣，齣頭百百款，有影是「燒酒啉落喉，痟人全齣頭」。
「啉酒蓋毋好」，啉燒酒除了會出車禍以外，毋好的所在猶閣誠濟，上毋好的就是會傷害咱的身體健康。人咧講:「有啉傷肝，無啉傷心。」根據醫學統計，啉燒酒對咱人的肝臟、心臟、胃腸、嚨喉、血管會造成負擔，著癌的機會比無啉燒酒的人加真懸。
「啉少顧肝，啉濟顧山」，啉燒酒有遮爾濟毋好的所在，奉勸興啉燒酒的人，燒酒小濕一下，啉淡薄仔來鼻芳，按呢對身體上好，閣會當啉出燒酒的甘甜佮清芳。若磕袂著酒捀來就欲乾杯，閣較好的物件，嘛感受袂著伊的珍貴，閣會拍歹咱的身體，仙算嘛算袂和。
¹嫻(hân)
(TOP)
這款一尺闊的長偝巾真好用，雖然囡仔大漢矣，到今，厝內猶閣留咧，毋甘擲挕捒，對伊，有真濟難忘的記持。
細漢的的時陣，看人咧偝小弟小妹，咱嘛綴咧興tshih-tshih，想講按呢較有大漢款。寢開始，阿母佇我尻脊骿縛一粒枕頭，意思意思，毋過袂過癮，閣共阿母囉規晡，三斤貓欲按怎偝四斤鳥鼠？紅紅幼幼的小弟也毋是白鳥鼠，阿母當然袂放心。有一工，趁阿母去菜園仔無閒，拜託阿姊共小弟讓我偝。人細粒子真正袂假𠢕得，偝甲翹翹倒，小弟予我硩甲哀哀叫。佳哉，大姊佇身邊，兩个人約束袂使得予阿母知影。
七歲的時，厝邊阿媽的金孫滿月，央我偝金孫過橋仔。彼改趁著一支雞摸蓋大支。佇散赤的桌頂，看著剁做一塊一塊的雞腿肉，想著家己會當鬥趁食，歡喜甲尾脽翹上天！
做人的老母了後，市面時行兩跤囊空的新型偝巾，毋過阿母嫌彼無合用，伊嘛是攢長偝巾予我，閣傳授我用偝巾偝囡仔的撇步。便若嬰仔腹肚膨風，抑是腸仔滾絞疼，就共抹寡涼涼的萬金油，紲落來偝佇尻脊骿，借母仔囝相倚的體溫，予嬰仔消風放屁。
這招予人呵咾甲會觸舌。實際應用確實有效，予我𤆬囡仔真順序。寒天時，母仔囝體溫相焐燒，燒入去到心肝穎。毋管是偝咧煮食，抑是款厝內，囡仔真緊就睏去。
捌問阿母，細漢的我敢好育飼？阿母搖頭，勻勻仔講：「你做嬰仔的時，有夠厚沙屑，極愛哭。恁阿爸做塗水，日時工課粗重，人忝、愛睏，你閣愛哭騙袂恬，伊會開始𧮙。我攏嘛偝巾偝咧，目屎含目墘，佇巷仔口行來行去。等到三更半暝你睏去，我才敢轉去。
「所以，我是覆佇你的尻脊骿睏大漢的？」阿母笑笑，伊的面容干焦有慈祥，無怨慼。總算了解家己的頭殼按怎會攲孤爿；總算袂閣怨嘆伊無共我的頭殼型生予圓圓圓。三更半暝，賰天星佮月娘和伊做伴，一个愛哭愛綴路的查某囡仔嬰；一个偝嬰仔佇巷仔口行來行去的母親的背影。......阿母！欠你的恩情，永遠嘛還袂完！
(TOP)
做老師的時陣，有教過一篇文章〈一束鮮花〉。這篇文章的主題是講一个真荏懶的人，朋友送伊一束鮮花，為著欲好好仔欣賞這束鮮花，就開始洗花矸、拭桌仔、摒掃厝內厝外，最後連家己嘛款甲清氣啖啖，規个人變甲真清爽、真快活。
這篇文章是咧共咱講，環境會影響咱人的精神，平常時就愛注意環境衛生。咧教學生的時，這个道理攏講甲喙角全泡，毋過佇實際的生活當中，厝內的物件攏是四界遺、烏白㧒，有的無的，抾甲一大堆，一間厝若棧間。共厝裡整理予好勢？家己攏嘛揣一个藉口¹：「這陣工課、家庭傱來走去，哪有時間通整理咧！」
這个藉口拖甲退休了後，才想講：「厝內著愛來摒摒、款款咧！」就按呢，選一个良時吉日就開始款厝內。寢開始坱埃的所在，就提布條來拭拭、拌拌咧！桌仔拭了，順紲拭桌燈；書架清了清書櫥……。毋過拭來清去，煞發現一个問題，為著欲拭桌仔，桌仔頂的物件就遺踮塗跤；欲清書架仔，書架仔內的書閣提去囥踮書桌頂……。搬遮徙遐、抾遮㧒遐，向甲腰痠背疼，舞甲汗流汗滴，結果煞一四界亂操操、塗跤挐氅氅，煞毋知欲對佗整理起。這个結果哪會參〈一束鮮花〉這篇文章所寫的無仝咧？
恬靜仔想咧！才發覺問題是佇彼種甘放毋甘放、甘捨毋甘捨的天人交戰；定定共一疊簿仔紙擲㧒捔，想想咧隨閣抾轉來囥；一張卡片拗拗掉，隨閣褫開來看……。㧒去抾起、拗去褫開，毋但摸規晡摸無寮仔門，閣舞甲心情真齷齪。
我就共這種整理厝內的感覺，囥佇阮同學的line頂懸，結果引起逐家的討論：阿美就講，厝內較無咧用的物件攏收佇棧間內；阿秀上頭疼的是，伊若共物件清掉，彼个抾拾的翁婿就閣抾倒來，看破了後就準拄好去矣；阿華講伊是共物件分上重要、重要、無重要的，分批來處理；秀花猶閣較飄撇，伊講欲退休進前，就共物件清清款款咧，分予需要的人，厝內的物件，嘛是按呢處理。
看著按呢寫，我才知影，若欲共厝整理予好勢，就愛看家己的智慧囉！原來〈一束鮮花〉這篇文章內底，猶閣有遮爾大的道理，愛聽候咱去體會咧！
¹藉口(tsià-kháu)
(TOP)
(轉去主目錄)
沒有留言:
張貼留言