2012
06281818101 年閩南語朗讀文章-教師組
101 年閩南語朗讀文章-教師組[
01 講著食 吳永行
02 批 吳嘉芬
03 爸囝 藍春瑞
04 夢中的大瓦厝 莊桂英
05 阿爸，請你愛緊好起來 鄭昱蘋(Io̍k-pîn)
06 mi-sín(ミシン)佮『麻吉』老爺 陳士彰
07 來去崁仔頂 賴錫(sik)真
08 講古講未來 王秀容
09 做囡仔的好肥底 蔡瑋琳
10 放送頭 張翠苓
11 跋桮 徐嘉澤(ti̍k)
12 雞籠中元祭 賴錫真
=================================================================
「有毛的食甲棕蓑，無毛的食甲秤錘，兩跤的食甲樓梯，四跤的食甲桌櫃，有肉的食甲肉燥，無肉的食甲糞埽(pùn-sò)。」講甲咱台灣人實在有夠愛食，無毋著，「民以食為天」，「會食才是福」。歷史共咱講，每一个朝代的滅亡攏因為是民不聊生，百姓毋是食袂飽，就是無通食，才會攑(gia̍h)旗造反。因為「千辛萬苦攏是為著腹肚」，為著食就共神明撥一邊，無哪會講：「先顧腹肚，才顧佛祖。」為著食嘛著愛共親朋好友請去邊仔徛(khiā)，因為歹年冬的時，「人無親，食上親」。甚至「欲刣、欲割也著食一頓飽」，莫怪有人講「管人生、管人死、管人食無天理」。
食的滋味是「一人興一味」，有人興燒酒配鰇(jiû/liû)魚，有人興大腸炒薑絲，有人興三層肉炒筍絲，嘛有人興芹菜炒花枝。「有人興鹹，有人興甜，有人愛山珍，有人愛海味」。會使講是「一人一雙箸，欲夾無仝味」。食落腹肚底是「隨人落箸，在人滋味」。病囝的人講愛食彼號(lō)王梨炒筍絲，啊阮阿母上特別，講我佇伊腹肚內的時上愛哺(pōo)冰角、食魩仔魚。就是按呢喔！我這馬才會遐爾仔愛食礤冰(tshuah-ping)佮煎魚。
食的物件嘛有分好䆀，若海產類的是「一鯧(tshiunn)、二𩵱(ngóo)、三嘉鱲(ka-la̍h)」，「七月的蠘(tshi̍h)仔，八月蟳(tsîm)」，「冬節烏是較贏豬跤箍」。菜蔬類的是「塗豆食仁，蕹(ìng)菜食藤(tîn)」，山頂番薯鬆閣甜，懸山的高麗菜是人人愛。抑若果子本土的弓蕉上蓋好，「十二月的甘蔗是雙頭甜」，「枝頂菝(pua̍t/pa̍t)、葉下檨(suāinn)」，「王梨頭、西瓜尾」，好食愛會曉揣。秫米荔枝，烏真珠的蓮霧，愈食是愈紲喙，這馬進口的果子是滿滿是，榴槤好食，冷凍的閣較好滋味。富士蘋果，美國櫻桃，紐西蘭的猴頭果(奇異果)，應有盡有，只驚你無錢通買，毋驚你買甲食袂去。
外國人來台灣上愛踅夜市，因為咱的夜市仔點心有真奇巧的口味。看是欲筒仔米糕、肉羹、抑是臭豆腐。棺柴枋、扁食、抑是擔仔麵。閣有食袂枵的芋粿曲，食甲飽的米粉炒，尤其是烏魚炒米粉，食著是金光沖沖滾，看你偌歹喙斗，只要夜市踅一輾，無食你敢會過癮(giàn)。
較早的人較散，「查埔欲食愛望人請，查某欲食愛望生囝」。這馬的人生活普遍攏會得過，顛倒各種慢性病一大堆。啥人(siáng)叫恁食好閣做輕可，貧惰運動閣愛享受，定定「一塊才落肚，一塊喙內哺，一塊佇半路，一塊盤仔底顧」。「甘願做飽鬼，嘛毋願做枵鬼」。較細膩咧！毋通因為好食、愛食、貪食，耽誤家己的健康。(TOP)
下班轉來，拄欲入門，看著門頂的「信箱」櫼(tsinn)甲滇(tīnn)滇，伸手共提出來。開門了後，巡看這堆是啥物？有水電錢的收據、兩間大賣場的廣告單、百貨公司週年慶(tsiu-nî-khìng)限時大拍賣、新開幕的自助餐大優待宣傳單……揣無一張是應該囥佇「信箱」的批。共這堆五花十色的紙，先擲桌頂，暗時食魚仔吮(tshńg)魚刺通用。若無，食西瓜呸(phuì)子嘛好。
「信箱」內底無半張批，這个情形，毋知經過幾冬囉(looh) ！
你有偌久毋捌攑筆寫批矣？寫予你思思念念的伊、寄予你遠遠的親情(tsiânn)朋友。我若是共身軀邊的人問這个問題，總是予人笑講：「你是食飽傷閒咧換枵喔(ooh) ！這馬啥物時代矣，若有代誌，電話、手機仔一敲(khà)，隨就撨(tshiâu)好勢；較重要的文件、資料抑是相片，電腦一開，「電子信箱」傳過去，一枝指(tsíng)頭仔就四序；想欲聽著聲閣看著人，「即時通」馬上應付你，寫批欲哪會赴市咧！」
毋知佮我仝款捌靠寫批解鄉愁、寄相思的你，彼當時敢想會著有一工，寄批毋免用批囊(lông)、貼郵票？如今，資訊(tsu-sìn)發達的『e』世代，彼當陣的「筆友」早就無時行，這當陣流行的是「網(bāng)友」。攑筆寫批對現代人來講，敢毋是閒甲掠蝨母相咬的人，才會做的戇代誌咧？
想著我頭一擺寫批，是替阿母寫予外媽。彼陣，我才欲讀小學二年，字捌無幾个，有的用注音寫，有的阿母教。阮阿母冊讀無濟，毋過字寫誠媠，伊欲共外媽講的心內話，一句一句唸予我聽，我一字一字勻勻仔寫。寫規半晡，一張批總算寫好勢，對臺東深山林內寄到嘉義的山頂尾溜，一來一去愛成(tsiânn)個月是真正常的代誌。阮的批雖罔有貼郵票、寫住址，毋過，送批的會共仝庄頭的批，做伙囥佇街仔口𥴊(kám)仔店的「大信箱」，家己愛出去巡，共批提轉來，定定收著批，好歹代誌早就過去矣！知影嘛無路用。所以，真要緊的代誌就愛拍電報，往往聽著的，攏是親人過身的歹消息。
拄開始學寫批，也捌共寄批佮收批的住址寫顛倒反(píng)。隔幾日仔，閣收著家己寫欲寄予外媽的批，批囊予人頓(tǹg)「退回」，毋但了兩箍的郵票錢，閣險予阿母罵死。(TOP)
阿義初中出業，去花蓮讀五專，頭年就捌著牽的；毋過，隔轉年六月欲升二年的歇熱，就𤆬(tshuā)轉來厝裡，共老爸講伊無愛去讀矣。到底是啥緣故，嘛無人知。自按呢辦退學，踮厝綴老爸做生理。都無半冬，聽講是有身，兩个才著結婚。連紲生兩个囡仔，阿義才去做兵。彼陣，小弟阿文讀大學二年。
阿義十七歲就踮厝裡，功勞、苦勞伊上懸，承續(sîng-sio̍k)老爸的事業，定著伊排頭範(pān)的，別人袂當佮伊爭；就是這个緣故，伊共阿文看做是欲來佮伊搶家伙的冤仇人，較加嘛對阿文無好面腔(tshiunn)，實在也袂使怪伊。
兇兇狂狂到一个生份所在做生理，閣變(pìnn)無成(sîng)，是伊家己看耽(tânn)去；毋過，佇阿義心肝內原底猶有一必一中(it-pit-it-tiòng)的把握，嘛認定干焦伊有資格通去試；定著愛予伊選、予伊先去。仝這个道理，伊若試袂使(sái)，翻頭閣轉來頭城，別人袂使插喙，袂使笑伊，閣愛歡歡喜喜去接受伊、讓伊。
腹腸狹(e̍h)的阿義，有遮的想法，閣講袂出喙，煞共怨慼囥踮心肝頭，磕袂著就欲揣阿文出水，毋是正剾倒削，就是反(píng)歹面色予伊看。是講，若干焦按呢舞，也無起跤動手，敢會使講阿義毋著咧？
另外猶有一个誠僫(oh)比並(pí-phīng)的所在，就是阿文大學出業，欲引頭路較緊，應該出去，莫踮厝佮阿義爭才著；這嘛是阿文到落尾會看破世情，無愛佮伊計較的緣故。
後來，撞突(tōng-tu̍t)勻勻仔濟來，勢面愈來愈䆀，雄雄阿文嘛想無步通敨(tháu)，毋是「避(pī)」就是「逃」；見有閬縫(làng-phāng)就旋(suan)去送貨、收數(siàu)，罕得佇店。代誌行到這个坎站，予阿文無去拍算後過的出路袂煞矣，有大兄就無伊，閣留嘛無啥意思矣。
拄搪(tú-tn̄g)老爸佇大溪(Tāi-khe)倚濱海公路邊，新買一坵(khu)焦田，租一隻怪手咧整地。伊逐工攏有去巡、去看。有一暝，阿文佮伊坐咧開講，老爸先開喙：「恁阿兄遐無講情理，你敢袂怨伊？」
「伊序大，論功勞、苦勞嘛較濟過我；另外，伊冊讀較少，閣佮(kah)兩个細漢囝，若平平規家𤆬出去討食，真正有比我較歹過淡薄；你做老爸原仔有講袂直的所在，為伊、為我攏僫撨(tshiâu)......」停睏兩、三秒閣講：「歸尾，若欲家和就愛讓伊；這我無怨嘆，干焦想欲緊旋爾爾。」阿文做一氣(khuì)講煞，心肝內加快活足濟；毋過，後過的出路佇佗，才是阿文上驚惶的所在。(TOP)
昨暝，我又閣轉去阮兜的大瓦厝。
門口彼欉榕(tshîng/tsîng)仔足大欉，青色的樹葉仔發甲密密密。
榕仔的後壁，是兩間灶跤。只是用足低的牆仔圍咧，會當相通(thong)、相看。
灶跤的後壁，是浴間仔。浴間仔的外口是一个長形的大水池，半暝的時陣，所有的新婦攏佇遮舀(iúnn)水洗衫兼開講，定定笑甲足歡喜。
水池閣入去才是阮兜的大瓦厝，倒手爿有三間房間，正手爿嘛有三間房間。倒手爿上尾間是阿媽的灶跤，閣來是細漢阿姑的房間，頭前間是阮兜六个人的總鋪(phoo)，爸爸排第四。
正手爿第一間是阿公阿媽的房間，閣過來是阿公共人看病開藥仔的所在，有一塊匾(pián)頂懸寫「文秀國術館」。阿公是一位功夫真厲害的師父，會曉拍拳、點穴，伊的藥仔會當治療足濟歹醫的病。阿公過身了後，爸爸六个兄弟就是佇遮抽鬮仔分土地。逐家攏照抽的結果來行，無人有別款話。
阿公的手尾──國術館放予五叔仔，因為伊的身體上䆀，袂當出去揣頭路，所以逐家攏同意將國術館予伊，包括一粒講是無價之寶的馬卵。
第三間是籠仔(láng-á)工場的工人蹛的房間。
中央的大埕是爸爸兄弟仔做伙煉膏藥的場所，也是練功夫拍拳頭的所在。佇阿公猶閣在世的時陣，姓莊的宋江陣就佇阮兜的門口埕咧練習。阿公過身了後，換五叔仔佇遐教徒弟。大埕是逐家公家的，天氣燒熱的時陣，就會當看著十幾个囡仔佇遐耍「過五關」、「蹌跤雞」、『一二三木頭人』，猶有五、六个新婦佇遐披衫、曝被單、曝棉襀(tsioh)被；過年前用竹篙曝肉乾、魚脯、煙腸(ian-tshiâng)，規个埕曝甲滿滿是。
年仔節仔，會佇大埕囥兩塊圓桌仔，每一个新婦會先佇家己的灶跤煮菜，尾仔才捀(phâng)來囥踮埕裡的兩塊圓桌仔頂。無排椅仔，大人囡仔攏徛咧食，對這桌食到彼桌。我上愛食米粉炒，二姆仔的米粉炒真正足好食；阿母煮的瓜仔雞，芳絳(kòng)絳，芳過幾若條街；三姆仔做的八寶丸比菜市仔賣的閣較好食。逐家食飯配話，連月娘有出來、無出來，都無人會發現；有放炮、無放炮，嘛無人會注意。(TOP)
從到今(tann)毋捌想過欲對阿爸寫啥物。但是現此時，我卻是坐佇病床邊，看阿爸吊大筒(tâng)、毋知人去、無氣色的面容，我的目屎含牢咧，驚無細膩滴落來會予別人看著。
阿爸少年學會曉修理錶仔，所以外公將阿母嫁予伊，想講做生理的錢水較活。我出世的時，已經佇南投的街仔租一間店面，七坪大的店頭養飼阮七个查某囡仔，另外兩个小妹送予別人飼。街仔人攏笑阮兜是七仙女、八美圖。聽講生小弟的時，閣請人客咧。這件代誌，會使講是彼當時鎮裡誠轟動的笑談(tshiàu-tâm)啦!
生遮濟查某囝，阿爸伊上惜我。因為我纏伊上牢，捌一擺伊出門無𤆬(tshuā)我去，我就並(phīng)佇門口，吼甲伊轉來。所以，後來便若暗時無閒煞，阿爸想欲去跋一下散筊仔(sàn-kiáu-á)就愛𤆬我出門才會準算。
細漢猶有一个真深的印象。一擺綴阿母、阿姨佮一陣姊仔去彰化的二姨兜食拜拜，轉來的時一陣人落車去矣，煞放我一个佇車頂予客運載走。等我精神的時，看著阿爸佮人咧講話。伊抱我坐佇『oo-tóo-bái』頂，我將阿爸攬牢牢，覆(phak)佇阿爸的尻脊骿，烏烏暗暗的天邊，一點一點的光，是星光、燈火抑是火金蛄？毋知驚的我，永遠會記得彼工暗時，阿爸的尻脊骿。
阿爸，你愛緊好起來。會記得我共你講過，等我退休，我欲𤆬你去環遊世界。你若歡喜我所講的約束，就愛趕緊好起來，因為這个約束愛閣幾若冬咧！
讀國小的時做值日生(ti̍t-ji̍t-sing)，中晝袂使轉去厝裡食飯，阿母講會捾便當來予我食。有一擺，等甲時間過，猶無人捾便當來，看人咧食飯的時我無飯通食，感覺真歹勢，就走去運動埕遐覕，恬恬咧吼，無偌久，看著阿爸提便當咧揣我，我歡喜甲緊傱(tsông)過去。
六年的時愛媠欲買懸搭(tah)，佇店裡一直咧挐阿爸。阿爸真受氣共我罵，我煞喙仔翹翹。阿爸上氣人翹喙，伊就氣甲共我捻喙䫌(phué)。過都無一分鐘，伊共我講：行啦，去佗買啦？目屎含咧，我面仔笑笑𤆬阿爸去鞋仔店。原來阿爸是惜我的。彼下喙䫌阿爸伊一定捻甲真毋甘。
阿爸你若毋甘我佇咧艱苦，你就愛緊好起來。醫生拄才來，講你無啥要緊啦！真緊你就會當轉去厝裡矣。阿爸，知毋？真緊你就會使出院矣啦！(TOP)
看我這台『má-tsih』的老爺車，水啉甲差不多矣，ia̋n-jín的溫度嘛加降真濟，無閣再趕緊出發袂使得，到高雄猶有一半路咧。
我規个頭殼底，想講阿娘這陣倒佇加護病房，毋知有要緊無？想著遮，就閣想著五年前，阿娘對一樓跋落地下室。彼擺佇加護病房蹛三禮拜久，對頭殼頂到兩肢跤骨，插甲全全管(kóng)。阮兄弟姊妹，逐擺若入去加護病房，就是目箍紅紅出來。這擺毋知會像頂擺按呢袂？
車那開，對面車燈射過來一條一條的光線，感覺親像射對頭殼底，變成一條一條的醫療管，閣若像一條一條的線，穿過阿娘彼台『mi-sín』的針鼻仝款。
會記得讀小學四、五年的時陣，阿娘就有淡薄仔老人目矣。逐擺若車衫仔，攏會叫我的二兄，代先將線穿過針鼻。因為二兄毋但聽話，也是阮所有的囡仔陣，上𠢕變工藝(pìnn-kang-gē)的，所以阿娘比較較信任伊。
有時陣我嘛會要求阿娘，予我穿一擺線看覓咧，總是攏予阿娘拒絕：「生雞卵無，放雞屎有，小等咧針予你毀(huí)歹去，我就加食力的！」
有一日下晡，阿娘閣叫二兄共伊穿針，了後就去灶跤煮飯。我趁著機會，就一直共二兄姑情(tsiânn)：「二兄！拜託咧啦！予我穿一擺看覓咧好無？」
「若去予阿娘知影，咱兩个攏會去予伊修理甲金tak-tak ！」講起來，二兄佇阮兄妹內底，比較較無膽。
「免驚啦！袂啦！」我一直共伊姑情，精差欠一下跪。
二兄除了無膽以外，嘛是上蓋軟心的。伊予我吵甲無法度，就起來予我穿針。
我手提著線一直咇咇掣(phi̍h-phi̍h-tshuah)，『mi-sín』彼枝針㽎(sìm)一下㽎一下，我舞甲大粒汗細粒汗，線猶閣是穿袂過針。
「你的正跤愛共跤踏仔小(hân)咧，彼枝針毋才袂㽎走去。」二兄看袂得過，就共我教。照伊的話，正跤跤踏仔，有影彼枝針袂閣㽎，毋過線仝款穿袂過。
二兄講：「針鼻傷細空，你愛用喙瀾共線頭小可啖(tam)一下，毋才穿會過！」
俗語咧講：「坐轎的毋知扛轎的艱苦」，無經驗過真正毋知困難。(TOP)
「上鮮的佇遮啦！上鮮的佇遮啦！」逐尾魚仔活跳跳閣金鑠鑠，遮鮮的魚仔，逐尾都真想欲買來去煮，毋過看著魚仔目睭瞪(tènn)甲真大蕊，咧掠阮金金相，閣感覺真毋甘。
基隆的崁仔頂漁仔市佇清朝時代就有矣，彼陣先民利用舢舨仔(sam-pán-á)共鮮魚運到旭(hiok)川河，然後崁仔起去路面，才閣將貨割予魚販仔，彼个河邊的「崁仔頂」就是這馬的魚仔市。
我有同學蹛佇咧崁仔頂，我捌去過，所以路草我猶會認得。阮到位的時天貓霧仔光(bâ-bū-á-kng)，漁仔市內底人挨挨陣陣，逐个擔仔位攏咧交割(ka-kuah)。
「上鮮的佇遮啦！上鮮的佇遮啦！」
阮老爸不止仔老古錐，佇初入戰場猶捎無寮仔門的時，看著一堆目睭金爍爍(sih-sih)，身軀紅金紅金猶閣趒(tiô)咧趒咧的紅目鰱，喝魚仔的喝講：200，200，200，手閣比比咧；老爸的手竟然嘛綴咧比出去，閣誠有氣魄喝講：「包起來！」結果一包就是17斤半，總共三千五；當場予人看起來就誠倯(sông)的阮兩爸仔囝自按呢煞愣(gāng)佇遐。彼頭家食過的鹽濟過阮食過的米，對阮這款人客嘛是白矸仔貯豆油──看出出咧，就按呢閣問一句：「欲挃無？」當然是一直搖頭啦！趕緊行對下一擔(tànn)去。
邊仔彼幾擔攏是蝦仔，攏有囥『氧氣筒』共遐的蝦仔保鮮。有一个漢草袂䆀的查埔人徛佇咧上頭前，看起來袂輸行仔內的款，伊連鞭(liâm-mi/pinn)喝聲，連鞭頕(tìm/tàm)頭，手嘛綴咧連鞭比懸連鞭比低；一觸(tak)久仔，遮的活跳跳的海產就攏予伊貿(bāu)去矣。
天色漸漸光矣，買賣嘛開始欲煞鼓矣；看老爸的眼神，若親像無買一寡魚仔轉去誠毋甘願的款。阮踅(se̍h)著一擔人咧喝紅魽(kam)『沙西米』，看甲踅神去的時，頭家雄雄提一大袋魚仔予老爸，問老爸看欲愛無，老爸目睭𥍉(nih)都無𥍉一下，隨應講：「橐(lok)起來！」ha̋nnh ！遮濟魚仔，是欲食到當時咧！ 我喙裡唸講：「爸！你買傷濟矣啦！食袂了啦……」老爸講：「袂啦！遮魚仔誠鮮，恁阿媽上愛食，進前咱蹛庄跤的時定定煎來食，足芳的呢！咱提一寡來去送予恁阿叔啦！」(TOP)
教冊若像徛佇大舞台。若無兩步七仔，下跤的觀眾朋友，毋是戇神覆(phak)佇桌頂補眠，就是偷看尪仔冊；較無規矩的，會開始嗤嗤呲呲(tshi-tshi-tshū-tshū)咧開講，講一寡五四三的；較惡質的，可能會搬海反(huán)，坐袂牢(tiâu)，徛起來烏白趖(sô)，遮觸(tak)一下，遐觸一下。
感心的學生囡仔嘛有，有的是毋管偌吵，猶原是目神有彼種予老師看了想欲閣較認真教的光彩，親像燒烙(lō)的日頭，予老師有一種活落去的勇氣佮拍拚的動力(tōng-li̍k)；雖然講甲喙角全波，嚨喉喝甲梢(sau)聲，烏枋寫甲手麻，跤徛甲浮(phû)青筋，關節炎加腰痠背疼，毋過有價值、有意義，值得拍拚。
另外閣有一款感心的，若看同學傷吵，伊會起來喝聲，叫人恬恬莫吵；雖然上吵的聲，就是咧喝的聲，毋過有這號(lō)為老師鬥出嚨喉的體貼佮勇氣，嘛會當算做是老師的菩薩矣！一樣米飼百樣人，囡仔有百百款，教冊的趣味較嬴過百百行！
做老師的，是世間上幸福的，每一分鐘，攏是咧創作無仝的故事。一班三十外个囡仔，對無仝所在來，受過無仝的家庭教育，想法無仝，做法無仝，講話的方式無仝，交出來的作業無仝，興趣的物件嘛無仝，致使每一个人發生的故事攏無仝。多元的人生，多元的變化，囡仔活佇這个多元的世界，老師就愛用多元的教法，來雕塑(tiau-sok)多元的未來。
雖然我只是一个小小的老師，毋過，我嘛是一个工程師，咧做一件比錢銀閣較有價值的性命工程，咧寫家己的故事，嘛咧寫學生囡仔的故事，甚至是咧寫咱人類的故事。人生誠奇妙，是一種循環，一項代誌，一个人，一分鐘，一秒鐘，對這个世界，攏有料想袂到的影響。
我會當教啥？欲挃(ti̍h)啥？欲按怎教咧？課程的專業傳授是上基本的，毋過佇傳授的過程，囡仔除了學著專業的智識來應付未來的考試以外，學著你對專業的熱情佮責任感，學著你教冊認真的態度佮組織表達能力，學著你佮人盤撋(puânn-nuá)講話的智慧，學著你情緒的控制，學著你對人的尊重佮對幸福的堅持。講起來，欲學的物件實在誠濟，有形的佮潛在(tsiâm-tsāi)的，攏誠重要。(TOP)
教育的種子佇佗位？教育的種子是愛對細漢就開始培養的，細漢就愛建立正確的價值觀。有一个充滿熱情的少年人，伊真佮意囡仔，想欲做老師，來教育囡仔，予囡仔親像種子仝款，會當種佇好肥底的田園，種子吸收塗裡的營養，發穎(puh-ínn)、發芽(huat-gê)，健康大欉，閣開花、結子。
好的老師就是好肥底的一部份。伊就是想欲做囡仔的好肥底，決定去參加一个營隊，號做「教育營」。這个活動是去原住民部落輔導囡仔的功課，伊想講參加這个活動，會當充實家己的教學能力，是做老師的起步。
這个少年人頭一擺參加教育營，雖然有滿腹的熱情，心肝頭嘛有淡薄仔驚驚，因為第一擺總是會生份。毋過看囡仔純真的笑容，隨時就歡喜起來，敢若共落(làu)風的雞胿(kui)仔灌風仝款。
原住民的小朋友，逐个攏生做足相(siāng/siâng)，袂輸一个模仔印出來的。見著伊攏會笑笑仔問伊：「老師，你叫啥物名？」上袂慣勢的是下課的時會共伊𢯾(mooh)牢咧，毋甘放伊走。甚至有時仔囡仔轉去厝裡，會閣隨傱(tsông)轉來欲佮伊耍。無時恬(tiām)，一日到暗都充滿活力(hua̍t-li̍k)。
伊知影，若是欲教智識佮道理，代先著愛佮盤撋(puânn-nuá)感情。就按呢，伊做一件足偉大的代誌，就是決定欲撥時間來雕琢(tiau-tok)遮的璞石(phok-tsio̍h)。伊利用食晝佮下課的時間佮囡仔鬥陣，建立感情，毋但會當教智識，也會當教禮貌佮規矩。紲落來一禮拜久，伊攏用真熱烈(jia̍t-lia̍t)的心來教，想欲教足濟智識，欲予一下仔就吸收真濟觀念。譬論講有一工早時(tsái-sî)上課，囡仔共早頓提來上課的所在食，咧食的竟然是泡麵佮「保力達P」，泡麵閣是用齧(khè)的。伊目睭褫(thí)甲大大蕊，袂輸看著啥物驚人的物仔。等到下課的時，伊就行過去共囡仔講：「這是毋好的、無健康的。」因為彼个囡仔認為按呢食無啥物奇怪，是真四(sù)常的代誌，伊就共囡仔講教一寡健康的觀念，向望會當改變的想法。(TOP)
是啥物因緣，會當佇歲月流轉三、四十年的時空，閣佇電台聽著放送頭周進升先生的聲音？
彼年，會記得是阮囡仔猶咧讀國校仔，我六點外起床，透早落來無人做伴的樓跤，拍開收音機陪伴我攢(tshuân)早頓。七點外送囡仔去學校，收音機內容放送啥是無咧注意，總是有聲就有伴。
有一工，咧等欲載囡仔出門的時，紲手捘(tsūn)音響彼粒選台鈕(liú)仔，捘著一个電台，輕輕仔放送出來一條日本『iàn-k』〈相逢有樂町(Iú-lo̍k-ting)〉的音樂。這條輕柔的音樂，有我細漢時溫暖的記持。音樂放送無偌久，聽著主持人的聲音，我人煞愣(gāng)佇遐。一開始彼條熟似的音樂，就予我聽甲已經茫去矣，閣聽著主持人的聲，我足毋敢相信，敢是咧眠夢？敢是我聽毋著？敢是我家己咧幻想(huàn-sióng)？伊的聲，明明是三、四十外年前，囡仔時佇庄跤聽著的。仝款的片頭音樂〈相逢有樂町〉、仝款的主持人，三、四十年時空的流轉，停止佇這个時陣，好親像踅轉去原來的所在，這是啥款的因緣！因為驚喜、因為感動、因為毋敢相信，規身軀毛管(mn̂g-kńg)空攏徛起來，咧向這个佮舊時空奇妙的相逢行禮。
我綴阮阿爸聽『la-jí-ooh』的年歲，是佇猶未讀冊的囡仔時。阿爸佮阿母對田裡作穡轉來，阿母入去灶跤款中晝頓，阿爸準時十二點捘開『la-jí-ooh』。雖然經過幾若十年，我猶原會記得，對『la-jí-ooh』放送出來的片頭音樂是日本『iàn-k』〈相逢有樂町〉。好聽的旋律(suân-lu̍t)，主持人低低迷人的聲音，陪伴阿爸過一个輕鬆的中晝時，阮嘛綴咧聽彼若捌若毋捌的廣播內容。想袂到彼个聲、彼个景，三、四十年後的這時陣，又閣浮佇面頭前，佇我的耳空邊咧霆（tn）！
細漢的時，阮兜彼台『la-jí-ooh』是真空管(tsin-khong-kuán)的，關掉的時，真空管的燈火真久才會化(hua)去。因為彼台『la-jí-ooh』捌歹去，表兄提去修理了後，腹內佮喇叭箱仔煞鬥袂好勢，只好分開囥，嘛才予我看會著內面慢慢仔化去的燈管。『la-jí-ooh』的外表無媠，伊的聲音卻是豐富我的囡仔時。會記得彼時節目的尾站，主持人總是用慢慢、低低真有磁(tsû)性的聲音講：「歡迎下一次暗時收聽！」怪奇咧，當頭白日的中晝時，是按怎伊逐擺攏叫人「暗時收聽」？(TOP)
阿公真𠢕講古，而且阿公的故事逐擺都無相仝，自細漢我就愛聽阿公講古。我想可能是因為遮的功夫，所以人客時常為著欲加聽一點仔故事，就加留一睏仔。故事聽煞，無買一个手錶轉去嘛講袂得過。但是阿公講這个所在的神怪故事，是真？是假？除了阿公以外嘛無人知影。毋過阿公講的親像是真的，時間、地點、人物攏總有，攏袂予人憢疑(giâu-gî)。細漢聽阿公講以前彼條護城河內捌蹛一隻會害人的鱉精。後來行過彼條河的時就會驚驚，誠驚鱉精(peh)起來就會共人拖落去水底。一直到今仔日，護城河予人修改了，河水清清，幾隻雁鴨(gān-ah)佇河面泅水，毋知名的魚仔佇水底泅，花草媠媠，蕨(kueh)貓密密。景緻改變了後，鱉精害人的形象才漸漸無去。
想起阿公講故事的時，人客定定問伊這句：「了後咧？」就閣共人的心思搝(khiú/giú)倒轉去矣。
阿公啉一喙茶，慢慢仔講：「阿慧從(tsîng)做過彼个夢了後，一直感覺袂安心，所以想欲上訴。伊倩人寫狀書佇城隍爺面頭前求情，希望會使開赦(khai-si)予阿勝早日投胎。伊一直跋桮，一擺閣一擺，攏是笑桮。伊受氣是笑桮、毋甘是笑桮、悲哀是笑桮、伊踅踅唸仝款嘛是笑桮，在場的人議論紛紛。伊哭講：「敢猶有天理？予一个人活甲人毋成(tsiânn)人、鬼毋成鬼，厝內有某囝、有爸母，伊驚家己拖累厝內的人，伊毋是袂當食苦，毋是袂忍得疼，是伊犧牲家己救一家人。我嘛怨伊毋閣忍落去，但是人都死矣，為啥物無欲予伊好好仔去投胎？」阿慧哭閣較濟，桮一擲落去嘛閣是笑桮。伊毋甘願，逐家徛佇邊仔看，攏頕(tàm/tìm)頭講城隍爺誠靈聖，彼毋是機率(ki-lu̍t)的問題，有人佇邊仔算，阿慧已經跋二十幾擺的笑桮矣，彼笑桮予人看著攏笑袂出來。
彼時陣天寒，外口落毛毛仔雨，逐家佇邊仔欲勸伊離開，伊雙手牽兩个囡仔，一个查埔、一个查某，跪佇遐毋走。最後逐家接載(tsih-tsài)袂牢，硬欲共伊拖走。伊大叫一聲，半空中彼當時拍落來一道爍爁(sih-nah)，共規間正殿(tsiànn-tiān)拍甲光焱(iānn)焱，雷聲貫(kǹg)入去逐家耳空內，阿慧可憐的表情嘛落佇每一个人的目睭內。紲落來伊一直磕頭，一直磕，一直磕，磕甲流血流滴，青石磚仔頂頭嘛親像予人鑿一窩(o)。阿慧喙內咧吼，逐家驚會出人命，趕緊共伊𤆬出去；伊兩手提桮，喙內踅踅唸，閣擲一擺……」(TOP)
歇熱的時，阮規家伙仔相𤆬轉去雞籠。車一下駛出磅空，遠遠就看著點燈結彩的主普壇，港墘仔燈仔火一葩一葩掛規排。規个海洋廣場已經有真濟人佇遐咧搧海風，那鼻海味那看大船放尿，順紲占上好的位置。
「乖孫！恁轉來矣喔！緊來。」小弟一下落車就隨走去共阿媽攬牢牢，阿媽長阿媽短，有夠古錐。暗頓規桌頂攏是阿姆的手路菜，足腥臊的，逐家那食那開講，誠歡喜；我對窗仔門就看會著規條街仔，人挨挨陣陣，趕欲來看鬧熱。食暗飽，阿伯𤆬阮起去樓尾頂徛懸看低，毋但看會著迎水燈的陣頭，閣會當欣賞大隻遊輪點聖誕電火彼款佮日時無仝款的模樣。
煙火雄雄對海面衝起去天頂，變出五花十色的花蕊，船螺仔聲嘛同齊霆。這个時陣，主普字姓的水燈車做頭前駛過來，鑼鼓聲齊(tsiâu)響，連鞭飛天，連鞭鑽地的龍陣、獅陣，佮金光閃爍的花車、藝閣……，鬧熱滾滾的陣頭，一陣接一陣真紲拍(su-phah)；贊普字姓的花燈車輸人毋輸陣，嘛是金光沖沖滾，押尾後。閣有文化局的「藝文華會」，嘛有外國的藝術團體來鬥鬧熱，沿路行沿路表演，精彩閣心適。觀眾噗仔聲一直催，逐家看甲喙仔裂sai-sai；阿爸講這款迎鬧熱的活動是干焦基隆才有。
「雞籠中元祭」差不多有一百六十年的歷史矣，伊的內涵有誠濟：有文化、藝術、宗教、觀光佮族群和諧的功能，閣有孝道佮博愛的精神。經過長期的交流演變，這个民俗活動這馬名聲迵(thàng)四海，閣予文建會登錄(lo̍k/lio̍k)做無形的文化資產呢！
阿公有共阮講：「先民佇開發的過程中有犧牲過足濟人，咸豐(Hâm-hong)三年漳泉拚，死108个人。當時在地的耆老(kî-l)展現出悲天憫人的腹腸佮智慧，利用宗親輪流主普，用「拚陣頭代替拍破頭」來化解仇恨。中元節的傳統對當時的「張頭許尾」，到這馬的「張頭郭尾」，流傳到今一百六十年毋捌斷過。
這擺阮轉來阿媽兜，順紲看雞籠中元祭的民俗活動，予我親身體驗著台灣歷史文化的趣味。(TOP) (轉去主目錄)
您好.請問教育部有聲音檔可以聽嗎???要去哪找呢???感謝回覆!
這个問題有幾若个人問過矣. 教育部無提供聲音檔, 只好靠家己骨力查字典, 抑是去請教人. 另外, 你會使去facebook的台語社問看有人知影佗位有咧提供無, 像舊年, 宜蘭市的母語教育就家己錄製予in的教育局囥佇網站予人參考.