2011
07091222100年全國語文競賽閩南語朗讀高中組文章內容
100 年閩南語朗讀文章 (下載內容)
01 臺灣像海翁 王麗蜜
02 月桃花佮海芋仔的故事 林文平
03 青盲抑是愛睏─寫施並錫(sik)的畫 陳明仁
04 竹管仔飯 洪錦田
05 荷蘭豆(hue-liân-tāu)田的日子 丁鳳珍
06 我的故鄉 陳清裕
07 山的感想 Nâ A-lâm
08 南秀山的大石頭 尤東林
09 星夜 林洪權
10 九份仔的興衰(sue) 蘇坤泉 (轉去100 年閩南語朗讀文章目錄)
==============================================
有人講臺灣是一粒番薯，因為𠢕(gâu)生湠，四界攏是番薯仔囝(kiánn)，嘛是代表這塊土地的性命力真強。毋過我感覺這種比喻無夠傳神，無法度共臺灣在地的性命力完全表達--出來。
代先，欲講--的就是臺灣親像一隻海翁。佇三百外冬前，咱的祖先就講臺江內海像一个海翁窟(khut)的地理，肚臍空佇鹿耳門(Lo̍k-ní-mn̂g)的出海口，所以，這个所在文人薈集(huē-tsi̍p)、人才輩出(puè-tshut)，尤其是鄭成功彼(hit)當時是按鹿耳門進入，經過臺南到安平--的，伊本身所傳--出來足濟的神話嘛是佮海翁有關。譬論講，有一个隱元禪師就講鄭成功是「東海長鯨(tn̂g-kiann)」來轉世--的，將來「歸東即逝(sè)」，後--來伊的部將有看著伊騎海翁向東爿(pîng)出海--去，無偌久鄭成功就佇安平過身--去。彼(he)是海翁的傳說附會佇一代英雄的身--上，並且佇臺灣加注一寡美麗的神話。毋過，佇這馬來看臺灣，你就會閣較肯(khíng)定臺灣親像一隻海翁。
淡水河親像海翁的喙空(tshuì-khang)，本來是一个美麗的喙空，煞因為汙染(u-jiám)害伊變成一隻有口臭的海翁，所以咱著毋通予伊破病--啊！一定愛好好整治淡水河，恢復伊美麗的面貌。伊的頭殼佇臺北，所以，掌握整個臺灣的思考佮決策，非常重要，千萬愛保持腦筋清醒才袂走毋著(tio̍h)所在。
宜蘭就像海翁頭殼頂的噴水口，所以當地有礁溪溫泉佮冬山河(Tang-suann-hô)的親水公園等等，並且宜蘭的文化有真濟特色，人才嘛是特別𠢕，應該是風水(suí)地理媠的關係！
嘉南平原若(ná)親像伊的腹肚，內容豐富，腹腸閣大，五穀、水果農產品生甲特別濟閣特別好，所以，這隻海翁自來毋捌枵(iau)--著。
臺南的地理上特殊，因為拄好佇伊的肚臍空，古早人講「一府、二鹿、三艋舺」，臺南府城就排第一，自古以來，人才輩出，按留--落來的古蹟佮作品就會當了解這个肚臍空孕育(īn-io̍k)偌濟優秀的人才，而且風颱掃袂著，大水淹袂著，地動上細力，廟宇神明上蓋濟，祖先閣攏有保庇，寒天北風閃有離，熱天南風承(sîn)會著，你講這个所在好抑是毋好--咧？ (TOP)
彼擺風颱做煞(suah)，規个草山的樹仔攏吹甲東倒西歪，有的三節(tsat)六曲(khiau)，有的欲(beh)死蕩幌(tōng-hàinn)，有的去予車軋(kauh)甲平平平，規支山袂輸去予人空襲--過仝款。毋過算--來，月桃花佮海芋仔也誠好運，因為經過這个風颱，無去予伊搧倒--去無打緊，閣生甲愈青翠，花嘛開甲愈媠(suí)。
彼工日頭炎炎，規个草山嘛沓沓仔(ta̍uh-ta̍uh-á)咧回復伊較早的光景。海芋仔就共月桃花講：「誠久無人來共咱參觀佮呵咾--矣呢！」月桃花應講：「是--啊！親像你這款遐爾高尚，遐爾媠的花，無人來欣賞，實在是真無彩。若阮--呢，出世就是歹命囝，佇山邊家己討食，家己大漢，運氣若好，拄--著仔開一下仔花--咧，敢(kám)有人會佮意--咧？」當月桃花的喙猶閣咧卯(mauh)--咧卯--咧的時，山跤傳來一陣仔一陣的歌聲，歌聲愈來愈倚近，聽--起來親像是少年家的款。聽著有人來，海芋仔心肝就phi̍h-pho̍k-tsháinn，歡喜甲擋袂牢(tiâu)，根本都無心情聽月桃花咧講遐(hia)的五四三--的。
遮(tsia)的少年家聽講是大學生，來草山欲採集標本佮參觀農民種海芋仔。代先看著月桃花，有的人講是「野薑花」，嘛有人講是「月桃花」，一句來、一句去，相諍袂煞。逐(ta̍k)家就遐挽--一蕊，遮挽--一蕊，無偌久，逐家攏𢯾(mooh)規把規把的月桃花。
時間過得誠緊，猶未參觀海芋仔田，就已經過半晝--矣！就共規把規把的月桃花紮落山--去。這个情景，海芋仔看佇目睭內，心肝頭又閣受氣又閣怨妒。
遮的學生轉--去了後，就共月桃花插佇花矸仔內底。宿舍的人看--著，毋是呵咾花媠，就是好奇咧問東問西。月桃花家己也感覺真光彩，這是伊自細漢到今(tann)上囂俳(hiau-pai)的一工。
一禮拜後，遮的學生為著欲趕一份報告，又閣上草山去參觀海芋仔，也順紲紮幾若把海芋仔轉--來。海芋仔看著冷吱吱(líng-ki-ki)的花矸仔內插著蔫(lian)--去的月桃花，就大聲笑講：「無路用的跤數。」當然，月桃花是難逃去予人擲(tàn)去糞(pùn)堆的命運--囉！ (TOP)
真久無轉去庄跤，趁過年有幾工閒，轉去故鄉彰化二林散(sàn)心，去田頭仔散心，也倒佇拋荒的田園草仔頂曝(pha̍k)日頭，無意中看著厝邊兜(tau)的囡仔共牛牽--出來，我想講都也真久攏機械化--矣，按怎有人閣咧駛牛？問牽牛的囡仔兄，伊笑我變都市人--矣，煞毋知農事作穡代。
彼隻牛也無拖車，也無拖犁、掛手耙(pē)，哪有成欲駛的形？閣講看彼隻牛，佇日頭跤，目瞌瞌(kheh-kheh)，毋知已經青盲抑是咧愛睏，看--起來閣老硞硞(khok-khok)，欲哪會有力通(thang)做工課。
飼牛兄的話予我歹勢(pháinn-sè)閣感動，臺灣自來是農業國度，播田、插甘蔗，牛提供主要的勞動力，反(píng)塗、犁田、祓稜(phua̍h-lîng)、拍磟碡(la̍k-ta̍k)、拖車、拖石磨……。毋管水牛抑是赤牛，攏用一世(sì)牛的性命奉獻佇這塊土地，才有法度建立臺灣的農業基礎，進一步用這款經濟力發展工業，造成今仔日臺灣社會的經濟，論功行賞，牛應該是第一功勞者。
幾擺出國，常在(tshiâng-tsāi)聽人講：「臺灣人是野蠻人，食銅食鐵，有毛的食到棕蓑，無毛的食到秤錘，啥物死人骨頭都有人食。」用按呢恥笑臺灣人。我共伊講：「臺灣真濟人無食牛肉。」對方應講：「牛肉是現代人的主食(si̍t)，臺灣人毋食牛，表示臺灣是落伍的民族。」我講：「臺灣人感念牛對阮的貢獻，不忍心食伊的肉。」對方講：「這陣無咧駛牛，閣講咱食的是肉牛，佮水牛無關係，臺灣人連這款智識都無。」
我實在無欲閣應話，臺灣人嘛知這種道理，總--是想著牛對咱的功勞，無論啥物牛，攏毋甘共伊食，這款感恩知報的心，毋是其他民族會得理解--的。
規个庄跤攏用機械耕作，運輸也攏有車輛，牛已經退休，真濟人攏閣飼牛，牛老硞硞佇草埔食草，溝仔邊啉水，日頭跤散步，樹蔭(ńg)歇(hioh)睏，目睭瞌瞌，毋知是青盲抑是咧愛睏，總是佇臺灣流落汗水了後，伊有資格予人共伊尊重、敬拜。
我告辭飼牛囡仔佮牛兄，佇黃昏的故鄉，沿一條予塗埋(tâi)--去的牛車路，那行那想，有一工，我所做的臺語文工課若有成就，我也欲轉來去故鄉養老，目睭瞌瞌佇故鄉的田園，親像我一首歌所寫--的：
牛車路，溝長長，想欲相借問，
你嚶嚶(inn-inn)ua̍innh-ua̍innh會當行偌遠，
敢會行過阮故鄉的田園？
白翎鷥，跤長長，敢會飛過阮故鄉的田園？ (TOP)
咱逐工咧食用碗貯(té)--的飯、食便當，誠(tsiânn)罕得食竹管仔飯。
竹管仔飯上蓋(kài)時行的年代，是阿本仔時代，彼當陣物質缺限(khueh-hān)，會當食白米飯是久久--仔才有一遍；貯佇竹管仔飯的量是真少，臺灣人粗做粗食，白米摻(tsham)番薯簽是足四常--的，逐工作穡都無閒𩑾𩑾(tshih-tshih)，哪有彼號美國時間咧變(pìnn)遐--的碗糕齣頭？
聽講竹管仔飯是原住民佇豐年祭典的時，煮來招待外位仔來的人客；抑是講予囡仔去行遠路頭，到他鄉外里去討趁、去讀冊，做序大人--的攏會煮幾管仔予紮咧通食用。這款的竹管仔飯，就親像這馬的便當，猶閣另外加一種竹仔味佮山內人的口味。
做竹管仔飯的步數，有淡薄功夫佇--咧。代先是秫(tsu̍t)米洗清氣浸水，浸甲米心漲大才共伊撈(hôo)--起來，紲--落去共濫(lām)一寡香菇、肉絲、蝦米、豆油……遮的配料，若是講欲食較鹹淡(tānn)--咧，加下(hē)寡鹽抑是豆油；閣來，先共遮的料抐(lā)抐予齊勻(tsiâu-ûn)，才共伊囥踮鼎--裡，下寡水濕濕炒予伊半熟，尾手才灌入去竹管仔內。竹管仔猶未囥米料的時，定著愛用水摵(tshi̍k)予清氣，了後才共伊灌入去五分之四的量，予伊櫳(lang)櫳--仔，賰五分之一通予伊透氣，完成了後才閣用竹葉仔搵(ùn)澹，共伊窒(that)對灌米口。
一管一管的竹管仔，灌米灌好勢，就會當用火開始炰(pû)--矣，炰欲四、五十分鐘久，炰甲竹管皮臭火焦(ta)，米的芳味走--出來，按呢就差不多欲熟--矣；紲--落去用火尾閣烘一觸(tak)久仔，予水份較收束--咧，芳味攏衝衝(tshìng-tshìng)--出來，按呢就聽好(thìng-hó)食--矣。
欲食的時，用柴刀共臭火焦的所在剾剾(khau)挕捒 (hìnn-sak)，才破開竹管仔；這个時陣，好料--的佮芳味攏看會著、鼻會著，囥佇眼前的物件毋食，才是戇--咧，隨人欲食胡蠅家己欱(hap/hop)--啦。
烘熟的竹管仔飯，規支像飯條，外皮閣有一層薄縭絲像甜粿紙透明的竹膜(mo̍oh)包牢--咧；而且閣有一款真鮮沢(tshioh)的竹仔味摻米芳味，親像籠床炊米糕彼款味，會予人足想欲用箸共黜(thuh)一喙來食看覓(māi)--咧。
烘好的竹管仔飯，平時仔囥咧成禮拜，若摻一寡配料，會當擋欲到一禮拜外外外；這項竹管仔炰食的山地文化，佇阿本仔時代誠時行。 (TOP)
寒--人若到，行過彰化，你會看著粉白的花蕊一點一點，若像天星佇青翠的荷蓮豆頂跳舞，冬風吹--來，心情嘛綴(tuè)青gìn-gìn的荷蘭豆跳『Bàn-booh』(曼波)。尤其是都市無聊的暗暝，公寓內白鑠鑠(siak-siak)的紅毛塗壁頂，好親像有滿天的荷蓮豆花咧飛，倒踮荷蘭豆(huê-liân-tāu)田--裡，看天頂烏雲白雲傱(tsông)來走去的人就是我。
阮故鄉佇彰化縣埔鹽鄉的西勢湖，自有記持開始，逐(ta̍k)年寒--人，阮兄弟姊妹一透早就會予阿爸佮Aû(阿母)喝(huah)起床，籃仔囥(khǹg)--咧，一个一个跍(khû)踮田--裡。管伊透風落雨，管伊霜凍露濕，荷蘭豆莢(ngeh)是毋等--人的，三、四工著愛挽一遍，伊的青春袂當予人耽誤；若無，就會予人三嫌四揀，毋值幾仙(sián)錢。差不多新曆十月初，荷蘭豆子(tsí)著愛種落塗，搤空(iah-khang)、掖(iā)子、崁(khàm)塗糞、崁稻草，規家伙七、八个出動，分八加分七的田著愛對(ùi)透早雞啼跍到日頭落山。十二月底就會當載著頭擺收成的荷蘭豆，去果菜市場換錢轉--來。
挽荷蘭豆是一件真艱苦的代誌，門一出，冷風就掃對面來，行落田，跤手就凍甲咇咇掣(phi̍h-phi̍h-tshuah)，田塗澹澹，糊甲規衫褲，攑頭一看，眼前一片(phiàn)青gìn-gìn的荷蘭豆莢，若像仙(sian)挽都挽袂了。幼麵麵(iù-mī-mī)的豆穎(ínn)又閣對老欉邊發(puh)--出來，看--起來若咧跳舞的花蕊，若變做一莢一莢豆莢的時，會予人挽甲腰痠背疼，哭毋敢。目屎那(ná)流嘛著愛那繼續挽予完，一袋青翠的荷蘭豆會當換錢，錢會使換菜、換柑仔佮過年的新衫轉--來。
若欲趕早市，猶未十點著愛緊共豆仔載去農會賣；若傷晏(uànn)去，就只好載去果菜市場，佮人𤲍來𤲍去。買豆仔的人就揣(tshuē)空揣縫(phāng)，嫌豆仔傷柯(kua)，嫌豆仔傷細莢，嫌豆仔有烏斑，嫌豆仔有蟲空。嫌過來、嫌過去，半點鐘、一點鐘就過--去矣。作田人無面皮，一箍兩箍嘛想欲等看覓(māi)--咧，一斤豆仔若加賣一箍，三十斤豆仔就加三十箍，三十箍就會當買三塊煎粿，三塊煎粿就會當紮轉去田--裡，予咧鬥挽豆仔的枝仔食一下仔粗飽--咧。 (TOP)
若有人問起我的故鄉佇佗位？我攏會共伊講：「我有兩个故鄉。」咦？哪會按呢？認真講--起來這嘛無啥物奇怪，我是佇彰化埔鹽(Poo-iâm)的火燒庄出世--的，毋過猶未度晬(tōo-tsè)，就佮爸母兄姊規家伙仔，搬到臺北瑞芳的一坑仔(It-khenn-á)趁食，我嘛蹛佇遐(hia)大漢，就是按呢我毋才講：我有兩个故鄉。
頭一个故鄉：埔鹽的火燒庄。遐干焦是我佇咧紅嬰仔的時蹛較無一冬，實在無啥物印象，毋過，阮猶有一間佮親情(tsiânn)公家起的祖厝佇遐，三不五時仔嘛會轉去行行--咧，遐的厝邊隔壁攏佮阮爸母較熟似，到阮這代就較無相捌。遐算起來是傳統的農村，賰一寡仔年歲較大的，猶有咧種田，少年的攏出外拍拚較濟。遐的地勢較曠闊(khòng-khuah)，向東遠遠看，有看著八卦山脈，賰的三向攏是平地。講--起來嘛真歹勢(pháinn-sè)，我毋知影埔鹽的地名按怎號來的，抑若火燒庄的地名，照我所了解是彼个所在古早時代有咧燒瓦(hiā)，才叫做火燒庄，隔壁的庄頭是號做瓦窯。
第二个故鄉：瑞芳的一坑仔。我對度晬前就佇遐大漢，一直到娶某了後攏是蹛佇遐，所以對遐有較清楚。瑞芳的景色真媠，三爿(pîng)有山，一爿是海，閣有一條雞籠河流過鎮--裡，佮雞籠、貢仔寮、雙溪猶有平溪相隔壁，規年的雨水真濟。瑞芳的地名聽講是古早時代，第一間𥴊(kám)仔店的店名，演變做地名的，一坑仔的地名是因為遐有一个炭空號做一坑，這馬，這个𥴊仔店佮一坑炭空口攏總揣無--囉。從(tsîng)日本時代到一、二十年前，瑞芳是咱臺灣上有名的礦鎮，有金礦、銅礦佮炭礦，金礦佇九份仔上濟，銅礦是佇金瓜石仔出產，若是炭礦佇瑞芳鎮--裡就一四界攏有。毋過，金、銅愈掘愈少，炭空嘛愈掘愈深，生產成本就愈來愈懸，按呢就無法度佮進口塗炭相比並(pí-phīng)，礦產公司差不多攏收了了--囉。
「雞籠河」的景色嘛真媠，伊的溪底是上早有人發現沙金，才開始對伊的源頭去揣著九份仔的金礦區。以早規條溪咧洗塗炭，攏烏趖趖(oo-sô-sô)，這馬炭礦較少，溪水一日比一日較清，這種情形佇咧臺灣嘛真稀罕。
環境嘛綴(tuè)時代一直咧變化，阮細漢的時猶有「瑞濱海水浴場」會當泅水佮耍(sńg)海沙，青色的海水佮金色的海沙埔實在真媠。毋過從濱海公路開了後，海邊擲(tàn)足濟紅毛塗的肉粽，原來的沙埔煞無--去囉。細漢的囡仔伴，嘛是規臺灣溜溜去，猶留佇瑞芳嘛賰無偌濟--矣。 (TOP)
親像蠓仔咧唱歌，山頭有人咧叫--我；
那看那揣跤那徙(suá)，愈行愈倚聲愈大。
相拄歡喜手來幔(mua)，相招啉酒拳來喝(huah)；
出出入入無內外，來來去去閣有紲(suà)。
海墘、溪邊、石頭空、山坑仔、樹林仔、花草、青苔(thî)是咱祖先仔幾萬、幾千代所食、所穿的源頭，也是歇睏、𨑨迌、傳世的所在，山頂、田岸的路痕仔猶有牢(tiâu)出入、行踏所留--落來的跤跡。
見若禮拜有時間去山，對入山的第一步開始，親像咧陷眠按呢，我攏看會著的跤跡，聽會著啉酒、唱山歌的聲音，有感覺著歡喜的心情、哀怨的心聲，一遍閣一遍佇我的頭殼內玲瑯踅(se̍h)，耳空邊一直哼(hainn)，哼袂煞。
有當時仔，我家己嘛有成(sîng)咧起童(tâng)按呢，摻(tsham)做伙開講、滾耍(sńg)笑、招呼，講一寡仔年冬的好䆀(bái)、收成的濟少做啖糝(tām-sám)，加減講親情(tsiânn)、嫁娶、人情世事的代誌做議量，精差無提薰(hun)、檳榔出來請我食爾爾(niā-niā)，啊若食飯、啉酒是上捷(tsia̍p)的代誌；這陣古早人的穿插佮我足相siâng，講的話摻我仝款，無共我當做外人，所以我相信佮我身軀內底所流的是仝種的血，才會遐親，講遐有話，袂輸是仝一家伙，出入家己的灶跤仝一樣。
家己孤一个人，一工的山，毋過我袂感覺孤單，心肝頭顛倒鬧熱滾滾，無閒𩑾𩑾(tshih-tshih)咧和這陣無形無影，閣古意甲有賰(tshun)的古早人，踮頭殼內遨(gô)一日貼貼(tah-tah)，是我上興閣上暢的工課，這款放捒(pàng-sak)袂離的心情，予我誠毋甘遮(tsiah)緊就告辭，一定愛互相約束閣見面的日子才有落山。毋是我𠢕(gâu)拖沙，嘛毋是較纏，實在是這攏是我的親情五十、厝邊頭尾，嘛敢準是阮兜的門口埕、厝內底、灶跤間，哪著遐緊就行開--咧？
「山」就是祖厝，嘛是收留我的身魂唯一的所在，是規陣人不時佇耳空邊喝我，袂輸咧叫魂仝款，牽長聲閣會押韻，彼種的親切、綿爛(mî-nuā)的叫聲叫入來血脈內底，衝入去五臟六腑，挵甲心肝噗噗(pho̍k-pho̍k)叫，規身軀沖沖滾，予我無暝無日咧數念(siàu-liām)、掛(khuà)心，強欲接載(tsih-tsài)袂牢。 (TOP)
南秀山的坑崁內有一粒千年的大石頭，幾千年來，伊毋驚風也毋驚雨，猶原「老神在在」。有真濟人來遮𨑨迌，就是為著欲看伊的廬山真面目。南秀山也因為有這粒石頭，變甲「頂港有名聲，下港有出名」，逐禮拜日，遊覽車一臺接一臺，比北港媽祖廟閣較鬧熱。附近的土地也綴咧漲懸價，連較早無人踏跤到的草埔仔，停一下車--咧，嘛愛百五箍。較早的草寮仔，這馬毋是變做土雞仔城，就是變做KTV，規个南秀山煞袂輸一个小城市--咧。
彼粒大石頭逐工都感覺真光彩，想講伊這馬是南秀山的主角，莫(mài)講喝水會堅凍(kian-tàng)，南秀山的大大細細，攏著愛看伊的面色，所以伊嘛變甲足āng聲，不時就咧恥笑伊邊仔遐的細漢--的，伊講：「恁有影有夠無路用--neh，見若落一下仔雨，恁就綴雨水咧四界流浪，命運完全受別人的控制，性命一點仔意義都無。」遐的細粒石頭予伊按呢一下講，逐家攏恬恬毋敢出聲，毋過逐家心內攏知影，囂俳(hiau-pai)是無落魄的久，逐家攏等咧看好戲。
無偌久，大石頭附近的樹仔攏予人剉甲光光光，規支山親像拄仔剃渡(thì-tōo)的和尚仝款。當時仔聽講就是有財團欲佇遮開一間五星級的飯店。大石頭聽--著，歡喜甲臍(tsâi)強欲歪--去，想袂到伊會衝(tshìng)甲連財團都倚--來。一個月後，攄塗機、怪手、工程車攏齊(tsiâu)到，一睏頭的時間，無兩下手，大石頭倚靠的山坪，就予人挖甲平平平，賰大石頭一箍槌槌(tshāi)佇遐，仙看都袂慣勢，真無自然。這是南秀山自盤古開天以來，[予人](hőng)𧿬(thún)踏甲上工夫的一擺，伊較早穿的彼軀(su)青piàng piàng的媠衫，這馬攏[予人]褪(thǹg)光光--去矣。
面模仔齊變。大石頭嘛予上游遐的水流石「倒剾(khau)正削」、接載(tsih-tsài)袂牢，石頭煞變甲足冇(phànn)，落尾仔風化去，毋是變成砂仔，就是變成細粒石頭。
俗語講：「人𠢕(gâu)，袂堪得天做對頭。」我想：「石頭較𠢕，嘛袂堪得人做對頭。」 (TOP)
四周圍恬(tiām)靜。我行出客廳來到後園。厝邊隔壁的燈火攏已經暗，孤孤遠遠的路燈，透過樹葉仔，爍(sih)--一下、爍--一下。
日--時佇金黃的日頭跤，開甲笑文文的花……火紅的、粉紅仔、幼黃的、大蕊的、細蕊的攏恬恬徛(khiā)佇遐(hia)；等風共的芳味漸漸溢(ik)--出去，也等路燈三不五時共炤(tshiō)--一下。
日--時，明朗、華麗的景色敢若是現代的彩色片，這時變做恬靜、樸素古典的烏白片。
時間也變做無親像日--時遐爾緊。時鐘關佇厝內，錶仔嘛烏趖趖。看清楚，干焦樹仔頂歇睏的鳥仔，不時tsiuh-tsiuh叫，提醒我毋是烏暗暝唯一的存在。
攑(gia̍h)頭看，敢若是圓的烏絲絨的天篷(pông)，有真濟粒白sut-sut、金爍爍(sih-sih)、細細的光點：共這烏甲真齊(tsiâu)的天色，增加美麗、溫柔，閣神祕的光采。遮(tsia)的星閣真認份，無光甲共規个天頂佔牢(tiâu)--咧，也無共夜色變做白色，干焦乖乖徛佇頂面，排做真整齊閣真複雜的圖。
若是熱天的暗時、若是我猶閣少年，我會倒佇草埔頂懸，用目睭看--去，看講看會著偌濟真遠、真暗的星；看講分會出佗一粒是紅--的，佗一粒是青--的。嘛用目睭共『星座圖』連線，看會當連出幾種無仝的圖。熱天的星夜，涼涼真爽快，樹仔、花佮草仔的芳味恬恬佇暗夜中傳送，身軀邊飛的蟲仔抑是遠遠的鳥仔敢會是Shakespeare戲劇「仲夏夜夢(tiōng-hā-iā-bāng)」中的仙女變--的？
若是秋天的暗時，秋風涼涼嘛小可仔(sió-khuá-á)會冷，我會看遠遠的星，想著遠遠的真濟朋友，敢會嘛咧想--我？我會一面看星，一面想寫予朋友的批。
若到冬天的暗時，我大概袂閣徛佇後壁園看星，「冬天風，真難當」，我會坐佇厝內，透過窗仔門，來看冬天的星。冷吱吱的風，敢若冰角仝款，共空氣冰甲若像冰『bì-luh』，嘛共彼寡光爍爍的星冰著閣較光，閣較清，嘛閣較媠(suí)。Schubert(舒伯特)「冬之旅」內底彼位佇冬天流浪的旅行者，敢嘛有看著伊頭殼頂的星？ (TOP)
十外年前，九份仔做醮(tsiò)，對四界湧(íng)入來的食客佮車輛，將原本彎彎曲曲並無偌闊的路，𤲍kheh)甲實捅捅(tsa̍t-thóng-thóng)。十一月天東北季節風，飄落來小小的雨絲仔，攏無去影響著濟濟熱情的親友，𤲍入來這个只有百外戶人的山城。
廟寺是逐(ta̍k)擺活動的重頭戲，三隻大豬公，排佇廟埕，正對著神明位，逐隻攏有千外斤，布袋戲佮歌仔戲棚搭佇廟埕的兩爿(pîng)；鑼鼓佮鼓吹聲，共原本的金仔礦源斷絕、大部份的居民攏已經出外討趁的山城，舞甲規暝鬧熱滾滾。
講著請人客，逐个攏嘛輸人毋輸陣。佇幾年前，猶有留豬槽(tsô)--的就緊飼豬公，若無--的，就想辦法共人訂豬公，出外的子弟嘛著愛轉來辦桌請人客。佇這工，逐家才發現故鄉原來遮(tsiah)爾迷人，親像佮五十年前頭擺做醮的時陣，仝款遐(hiah)爾仔鬧熱。
一百冬前，九份仔是無人行跤到的所在，自從金瓜石發現金礦了後。對各地湧入來欲開金礦的人，為著欲有一个遮(jia)風覕(bih)雨的所在，有真濟人，佇靠近金礦的九份仔起厝。彼當陣猶無鋼筋(kǹg-kin)，逐家用青貓石做地基，閣再抹紅毛塗，規个山頭佮山坪，攏會當看著真濟這款的厝。
金礦業當興的時，干焦基山街就有五、六間酒家，阮外公外媽就佇這條街仔尾開冰店。細漢的時，捌聽阮外公講起伊少年的時陣，就對汐止去遐做生理。伊講捌有一个金礦仔囝，日時經過酒家的時陣，予查某笑講伊一箍烏趖趖，親像一隻烏毛豬；這个金礦仔囝予伊譬相(phì-siùnn)毋甘願；等暗時仔收工了後，就穿甲俏俏(tshio-tshio)，去戲弄彼个趁食查某。講嘛捌有一个金礦仔囝，一時貪著金仔好價錢，趁逐家攏歇睏的暗時，去金爐偷提金仔，對小路欲偷走，去予日本仔大人(tāi-jîn)開銃(tshìng)拍--死。
金礦經過三、四十年的開採，礦源漸漸斷絕去，金礦也定定落磐(lo̍h-puânn)，雖然逐坑攏有倩傀儡戲來搬，嘛是無效果。到煞尾仔，有一寡地方士紳提議做醮，閣規定五十年後閣再做一擺。這就是十外年前做醮的由來。
講也奇怪，自從十年前做醮以來，吸引一寡藝術家來遮徛(khiā)起，有一片(phìnn)佇遮翕(hip)的電影也佇『威尼斯』的坎城影展得著獎，九份仔閣再開始有名--起來，昇平戲院邊仔彼間「小上海酒家」嘛變做逐家『尋根』的好所在。 (TOP) (轉去主目錄)
2011-09-12 02:28:18派星^^z 前往派星^^z的日誌
