04-109年全國語文競賽閩南語朗讀(教師組)0813修改

 2020

0826125404-109年全國語文競賽閩南語朗讀(教師組)0813修改

1166整理篇

(轉去109年全國語文競賽閩南語朗讀文章篇目)
(轉去主目錄)

 

01鹹酸甜的事務組　　王英娟

02斷翼的天使　　葉霖蓉

03無發表意見，袂使食飯。　　郭家華

04無常是生活的導師　　林曉瑛

05愛心菜蔬　　謝慈愛

06姊妹仔伴　　溫靜婉

07阿爸的心事　　徐華聲

08歹看面的　　宋展旭

09離別再練習　　林淑美

10多謝囡仔予我的肯定　　廖啟助

11囡仔　　洋洋

12同窗　　張月惠

================================

 

01鹹酸甜的事務組　　王英娟

　　舊年八月，新校長就任，伊予我有機會第一擺接事務組長。雖然講好聽是組長名，毋過人攏笑我是「做工的」，這是按怎講咧？

　　學校的大細項代誌差不多攏愛做，包山包海、哩哩硞硞。愛採購學校所有欲用的物件，嘛著愛敲電話叫師傅修理學校所有歹去的物件，閣著定定巡水電，看是有關抑是有漏水無？勞健保嘛著照起工來做。

　　採購愛遵照政府的規定，無是會觸犯法律。欲買進前愛量測物件的大細規格，發票佮收據嘛著愛注意內底的內容是著抑是毋著？除了按呢，閣著愛看物件的名稱、數量有符合所吩咐的訂單無？所買的物件同事敢有佮意用？遮的攏嘛愛斟酌。

　　有同事抑是學生囡仔講佗位愛修理，我就愛排無課的時間一个仔一个去巡，看有需要叫人修理無？若毋是蓋嚴重，先試看家己有法度修理無？佳哉厝裡有一个軍師，若拄著任何問題，翁婿攏會提供意見予我做參考，袂予我捎無摠。

　　毋過佇臺西這个風頭水尾的所在，倚海鹽份重，毋管是鐵門、燈座、門的後鈕抑是門鎖，逐項物件攏較快害。逐工耳空邊都傳來佗位愛修理的聲音，我攏笑笑回答。我的頭殼頂寫三字「欠修理」，因為我有修理袂完的工課愛做，連頭殼嘛著修理理咧。我需要充實自我對修繕的智識佮學問，才會當應付相連紲出現的疑難雜症。

　　有的修理工課愛排佇學生囡仔無佇咧的時間來做較安全，所以有當時仔愛利用放假的時間來加班。報師傅愛修理啥物所在？物件愛安裝佇佗位？閣著翕相做資料。配合師傅有閒佮我無課的時間來撨摵，而且愛綴修理才會當知影問題出佇佗位。所以講，事務組這缺就親像歌詞所寫的「無論是鹹酸甜抑是汗水滴，攏是人生需要食過的滋味……」。

　　雖然事務組有鹹酸苦汫的滋味，猶毋過，做這缺會當學習著佮人溝通的能力，嘛予我認捌一寡簡單的修理。閣發覺袂使看輕佗一途，就算是小工、散工，咱嘛攏有誠需要的時陣，因為三百六十行，行行出狀元！ (TOP)

 

02斷翼的天使　　葉霖蓉

　　朋友定定講：「你誠實有夠辛苦的呢，照顧這款囡仔是足費氣的。」我的回答逐擺攏仝款：「慣勢就好矣啦！啊都拄著毋，日子嘛是著愛過！」

　　會記得佇查某囝欲足一歲的時陣，病院的先生講：「恁查某囝的跤頭趺攏無反應喔，可能無法度行路！」我診斷書提咧，規个人戇神戇神，目睭看遐的囡仔每一雙跤是遐爾仔健丟，會走閣會跳，逐个攏耍甲遮爾仔歡喜，心內佇咧想講：「哪有人生跤煞袂行路咧？天公伯仔，啊你敢是咧佮我滾耍笑？阮翁仔某嘛毋捌害過別人，是按怎著愛受這款拖磨咧？」

　　常在一个人看查某囝睏甲誠落眠的面容，有影是真毋甘。捌想過先共工課辭掉，來陪伊做復健。猶毋過，厝裡嘛袂使無我這份月給，只好喙齒根咬咧，逐工公司佮病院兩爿走傱，毋敢喝忝。心肝內向望伊會當順序徛起來，歡頭喜面走過來叫我一聲「阿母！」這款一般的老母袂感覺稀罕真四常的代誌，我煞一直等攏無。這款情境毋知佇夢中出現幾擺？雄雄醒來，又閣予現實共我𢼌一下。

　　查某囝自細漢就足歹育飼，每一擺羊眩夯起來，我的情緒就綴咧袂平靜。十八冬矣，雖罔攏無進步，猶毋過我對性命的看法煞有真濟的無仝。對伊，我干焦賰向望伊會當健康快樂踮我的身軀邊，就算生活攏無法度自理，我嘛甘願服務伊一世人。這馬我已經接受人生的這層考驗，袂閣再怨天怨地矣！

　　幾若擺，規家伙仔出去外口食晝，抑是去𨑨迌，真濟人攏真好玄。捌有囡仔講：「這个阿姊遮大漢猶閣咧食手，實在是真見笑呢！」這个時陣大人往往會趕緊共囡仔搝走。毋過嘛捌有一个阿媽，閣順孫的話尾咧接喙，講一寡有的無的。嘛有一擺阮去山，拄著一个查埔人比伊的大頭拇：「恁是快樂的一家伙仔，加油喔！」佇寒人的天氣裡，我煞感覺有一絲仔燒烙，對我的跤底衝對我的心肝穎仔起來！

　　我向望逐个人著愛按呢善意來對待身障人士，嘛愛鼓勵厝內辛苦的一家伙仔！(TOP)

 

03無發表意見，袂使食飯。　　郭家華

　　兩冬前，我真好運有機會佇臺南大學讀冊，閣較料想袂到的是，我少年時數想的代誌竟然實現矣。我大學的時讀過歐用生教授的冊，心內捌想過：「若會當上這位教授的課，一定是一層真好、真有意義的代誌！」拄開始上課的時，我緊張甲會掣，嘛毋知影欲講啥物，毋過老師定定笑笑仔講：「上課無發表意見，中晝袂使食飯喔！」就按呢逐擺上課逐家攏真自然發表家己對課程理論的意見，而且老師對逐家發表的意見攏真重視，嘛會針對意見引導阮閣思考落去。

　　有一擺上課，老師講：「我四常講愛自我反省，今仔日我嘛欲來反省。我定定講老師愛放下權威，毋過我家己煞講，無發表意見，袂使食飯，遮爾權威的話，實在真歹勢。請逐家想看覓，這句話應該按怎改會較好？」有人建議共這句話改做「發表意見了後，就會使食飯矣。」用正面的話來引導學生。

　　我毋知影欲按怎改這句話，因為我並無認為這句話予我感覺老師是權威的人。我想「毋知影欲按怎改」嘛是一款意見，所以我就攑手矣。我表達的內容主要是共問題改做「我對這句話的看法」，因為無一定逐家攏認為這句是權威的話。老師捌講過批判理論提醒咱思考的時，袂使共問題佮伊發生的情境隔開，就是毋通『去脈絡化』。這句話是產生佇咱的課程當中，是活佇咱的對話當中，我坐踮遮學習，感受著這句話是咧鼓勵逐家思考，而且老師並無要求愛講甲偌好拄偌好才會使食飯。這句話若無管待伊產生的背景，伊可能是權威的，毋過若共伊囥入活的情境內底來思考，這句話就是趣味的、溫暖的。老師聽了笑笑仔頕頭，毋但無講我無照問題來回答閣共我鼓勵講：「按呢思考真好！」

　　「無發表意見，袂使食飯。」這句話的意義是活佇阮上課的互動當中，因為老師共逐家的意見看做真珠，所以這句話是引導阮思考的光線，是阮上課的時上蓋親切的話頭。(TOP)

 

04無常是生活的導師　　林曉瑛

　　無常是生活的導師，伊教咱愛珍惜身軀邊的一切，才袂有遺憾。自早就知影人生無常，毋過一直到十外年前，失去上親的阿母彼時，我才深深感受著無常所帶予我的驚惶佮心疼。

　　後生的舊曆生日和阿母拄拄好差一工爾，自伊出世，逐冬攏是和阿媽手牽手做伙切雞卵糕、歡歡喜喜食腥臊，媽孫仔兩人感情是有夠峇的啦。阿媽愛食剝皮魚，後生嘛是無剝皮魚毋食；阿媽愛看連續劇，伊就逐暗坐佇邊仔，陪老歲仔看，那看那綴咧學講話。不時閣會聽著比手畫刀咧討論劇情，有夠心適的。

　　捌聽序大人講過，人若欲離開世間進前，攏會有一寡仔無法度解說的行為。彼時，阿母開始逐早起坐佇尪架桌邊，安詳自在咧念經，據在我駛車載伊四界拋拋走，連罕得去的親家兜嘛綴咧去相借問。彼年的新曆十一月初，阮姊妹仔相招欲來共阿母佮阮後生做生日，逐家佇餐廳那食那開講、翕相，到欲切雞卵糕的時，阿母雄雄對逐家講:「今年，我無愛佮阮孫做伙切雞卵糕，我想欲請逐家另外食一頓仔豐沛的！」大漢小妹隨喝聲講:「好啊！好啊！按呢又閣有好料的通食。」我就講：「我闊喙食四方，緊咧！來撨一下仔時間咧！」就按呢，逐家十喙九尻川，上尾仔撨好兩禮拜後欲來食腥臊。

　　隔轉工早起，我送早頓去予阿母食。伊講伊頭殼足疼，我隨送伊去病院。啥人知影，這煞是阿母佮我講的最後一句話。三工了後，阿母就來離開矣。啊！哪會按呢？我猶有足濟話猶未佮阿母講，猶未好好仔有孝阿母呢！阿母！你哪會當啥物話攏無交代，就來離開咧？前一工猶和逐家好勢仔咧開講，這馬煞是一个冰冰冷冷的身軀。阮姊妹仔目屎含目墘來安排後事，就佇和師父選定出山時辰的時，我雄雄發覺出山彼一工，就是阿母進前決定欲請逐家食腥臊的日子。

　　原來，阿母早就已經決定好伊人生欲煞鼓的日子，只是逐家攏毋知。人生有偌長，咱無法度掌握。珍惜和每一个所愛的人鬥陣的時間，才袂有遺憾。(TOP)

 

05愛心菜蔬　　謝慈愛

　　歇睏日，後頭厝電話定著傳來老爸的交代:「轉來提菜瓜、匏仔、竹筍……攏是透早現挽、現挖的，幼sap-sap含露水的！」這款溫暖閣自信的聲嗽實在予人真數念。

　　老爸勤儉骨力，十六歲就考牢碼頭苦力，伊定講「做雞著筅，做人著反」。有當時貨櫃船期接無好勢，愛踮厝等通知聽候船入港，伊袂激懶屍趕緊利用工課縫，肩胛揹鋤頭，穿人無愛的拍鐵仔褲佮阿兵哥裘仔，頭戴免錢的競選帽、跤穿烏色的靴管，傱去山頂挖塗種菜。伊毋捌字，煞並讀過冊的人較𠢕拍算、較捌道理。伊相信「靠山食山，靠海食海」，人若儼硬軁鑽、骨力拍拚，天公伯仔絕對袂虧待咱啦！

　　山頂的穡頭對少年做到老，會使講是誠熟手。一年四季綴節氣咧種作，啥物時陣愛反塗、掖種、落肥、薅草、收成……攏一清二楚。熱人就種匏仔、菜瓜抑是苦瓜、金瓜、筍仔……；寒人就換種菜頭、山藥薯、芥菜……一大堆。大出的時是生甲密喌喌，拄採收煞，隔工予露水一下凍，隨閣插插插，濟甲挽袂離。

　　講著伊遮的菜囝菜孫，老爸就喙笑目笑，奢颺甲展風神講：「種作哪有啥撇步，當做飼囝，用愛心來共照顧絕對媠啦！」除了留寡家己食，招查某囝緊轉來搬以外，閣有通分予厝邊頭尾。經濟較差的家庭，阿爸嘛歡迎自由來提轉去煮。若閣有賰就佮阿母捾去市仔，半買半相送，凊彩喝喝賣賣咧，抑是佮熟似的菜販仔用菜換菜，落尾才貼寡錢換魚、肉轉來暗頓加菜。有時阮兄弟姊妹嘛趁著啖糝的四秀仔。

　　見擺接著老爸催阮轉去提菜的電話，阮一定大聲共應：「好啦！連鞭就轉去提！」雖罔頂擺提的猶未食完，阮猶原不忍心講出毋挃的話，毋甘看伊失望佮傷心。因為遮的農產品，雖然無蓋媠，老爸攏共當做親生囝仝款惜命命。閣再講一个八十外仔外歲的老大人，會曉利用時間去種作運動，予四箍圍仔的親朋好友，食著含露水的「愛心菜蔬」，這是偌爾仔稀罕的代誌呢！(TOP)

 

06姊妹仔伴　　溫靜婉

　　佇三十外年的職業生涯內底，逐階段攏有較好鬥陣的人，到今猶有聯絡的，就沓沓仔成做姊妹仔伴。

　　彼工落雨，毋過我足歡喜，嘛足期待我的姊妹仔伴欲來阮兜開講、唱歌佮啉咖啡，都足久無見面矣。

　　逐家一下看著就攬來攬去，手牽牢牢，當做相借問。猶未回魂過來，就佇遐嗤舞嗤呲講袂煞，鬧熱起來囉，誠實是「三个查某人，一个菜市仔。」無臭彈的，逐家面色攏足好，不而過身體加減有寡各樣，面容嘛加一屑仔皺痕，毋過逐家攏講彼是智慧的粒積。阮對遐的攏無咧掛意，因為快樂佮健康才是阮上要意的。

　　阮五个姊妹仔伴內底，有三个人予我足欣羨，從較早就佇厝裡食飽閒閒顧𨑨迌，因為的翁婿有才情，一人趁錢趁甲開袂了。內底有一个閣是無囡仔的『DINK』族，兩翁仔某定定相𤆬咧四界耍。佇面冊攏隨時看會著上山落海的相片，不時閣會出國𨑨迌，日子過甲不止仔樂暢。

　　我是拄退休，所以就賰一个猶咧上班。伊講伊攏做袂𤺪，欲一直做甲頭家共伊辭頭路為止。阮聽一下笑甲，笑伊誠實是阮的好模範。

　　紲落來，有一个講伊兩冬前離緣，害我掣一趒。因為伊的囡仔攏大漢矣，哪會遐爾想袂開咧？伊講伊無想欲予囡仔受影響，所以等大漢了後，才為家己拍算，欲予家己的日子過較歡喜咧。

　　這佮我最近看著的一篇文章足相。有一个七十一歲的美國查某演員，講阿母一世人咧成就阿爸，毋過佇八十歲的時煞共伊講：「我這世人無啥物成就。」誠實的，因為查某人定定予人向望會當共厝、囡仔佮翁婿顧予好就好，攏袂記得愛走揣家己的夢想。

　　咱這个時代的女性，較會曉疼惜家己，嘛知影家己會當做啥，閣會使按怎做。看著彼个姊妹仔伴遐爾堅定的眼神佮精彩的生活，我相信無論查埔人抑是查某人，活到咱這个年歲，著愛肯定家己，毋免管別人，才是真正愛家己。毋過我毋是咧鼓勵人離緣喔！有人的婚姻嘛足幸福，逐日攏過甲真快活。(TOP)

 

07阿爸的心事　　徐華聲

　　「華聲，去讀師專你會後悔袂？」

　　這句話，自我考牢以後，阿爸毋知已經問我幾擺矣。頭起先，我當做伊是煩惱學生囡仔歹教，我教袂來，所以我攏笑笑仔應講：「袂啊！教學生囡仔真好耍呢！」阿爸微微仔笑一下，就無閣講落去矣。一直到有一工，我才知影，阿爸定咧問的這句話，是伊囥佇心肝內的一粒大石頭。

　　讀國校仔的時，阿爸定定那散步那講歷史、地理予我聽。我攏想講：「阿爸捌遮濟，應該是會當做老師啊！若無，至少嘛是坐辦公桌仔的，哪會是一个流動攤販？這个謎無偌久就敨開矣。

　　有一擺咧開講，阿母講：「恁阿爸細漢真𠢕讀冊，毋過誠可惜，國校仔欲畢業的時，注重教育的阿媽煞來過身。恁阿公干焦想講閣有一个細漢囡仔無人𤆬，就叫恁阿爸鬥𤆬囡仔，莫閣讀冊矣，彼个囡仔就是恁阿叔。恁阿爸自十出頭歲仔就開始偝小弟、牽牛、作穡……，所以伊講，無論按怎艱苦，喙齒根咬咧嘛愛予囡仔讀冊就著啦！」

　　「是講我已經考牢師專矣，阿爸應該真歡喜才著啊，哪會定定問我會後悔袂？」

　　阿母掠我金金看，欲講若毋講：「其實……，恁阿爸真正欲問的是你會怨嘆袂？伊知影你想欲讀大學，因為厝裡散只好放棄，予伊想起較早講過的話。哎！自尊心予伊講袂出喙，只好換一句話問你。」

　　我總算知影矣！是按怎阿爸的兄弟內底，干焦阿叔會來阮這間破厝看阮。來的時陣閣會紮『可口奶滋』，芳芳甜甜閣脆脆，實在真好食！原來，阿叔紮來的餅，毋是干焦好食爾爾，內底閣有一份對阿兄的感謝。

　　我嘛知影囥佇阿爸心肝內的彼粒大石頭，干焦我才有法度共伊搬開。所以我若有轉去，就會分享教冊的趣味予阿爸聽，我欲用實際的行動慢慢仔搬徙彼粒大石頭。

　　一冬過一冬，佇我得著彰化縣第一屆的班級經營金像獎的時，我看著阿爸目睭內的光彩，我相信彼粒大石頭應該離阿爸愈來愈遠矣。(TOP)

 

08歹看面的　　宋展旭

　　「噓！恬恬，歹看面的來矣！」

　　舊年歇熱進前，拄好影著學校的公佈欄頂面有貼一張海報，寫講後禮拜一欲舉辦一場偏鄉學校服務的徵選，欲去的所在我連聽都毋捌聽過。本成閣咧想講這个歇熱，毋知到底欲創啥？好佳哉我的目睭蓋利，無共這个遮爾有意義的活動落勾去。

　　佇這改的徵選當中，若無兩步七仔，根本都無法度過五關，斬六將。我真正是十二月屎桶——盡拚，步數盡展，共我透世人所學著的功夫用甲盡磅矣。佳哉，天公疼戇人，上尾的錄取名單有我的名，會當hőng選著，真正是比著頭獎閣較暢。

　　紲落來一個月的培訓，真緊就結束矣，總算是到欲出發的彼工。佇咧車頂的時陣，主任就共我講：「這陣囡仔雖然真古錐、真活跳，毋過你若是無較歹咧，定著會起去你的頭殼頂，你著愛較注意咧！」聽伊按呢講，我是煩惱甲毋知欲按怎？啊，我想著矣。規氣就莫笑，按呢應該看起來就真有威嚴。所以自踏入去學校內底，我就決定激一个面腔，袂輸有人欠我幾百萬的款。

　　頭一節課，先共學生囡仔講班級的規定。徛上台仔頂，我就先歹聽話踏進前，若準上課的時陣，無遵照老師的規定，抑是無認真聽課程的內容，甚至是吵吵鬧鬧，攪吵上課，就愛受處罰，我嘛袂予恁有好面腔通看。

　　看學生仔可能發見我毋是遮爾好鬥陣的款，隨个仔隨个面仔攏青恂恂，我想應該是毋敢閣作怪矣。不而過猶閣是囡仔，欲愛乖乖仔聽老師的話，這盍有可能？後一節課，就隨袂記得我所講的話矣。所以我就用刣雞教猴的步數來共嚇驚。彼个𤆬頭的囡仔王隨喝講：「老師！我後擺毋敢矣啦！」我看伊頭犁犁，規班攏恬喌喌。嗯！這聲妥當矣！落尾上課有影就無人閣敢烏白作怪。毋過我的名聲嘛因為按呢迵京城矣，傳到規个學校的人攏知，連去便所，學生囡仔看著我都閃甲遠遠遠。後來閣聽講有人共我號一个名，叫做「歹看面的」，這馬想起來閣不止仔心適。(TOP)

 

09離別再練習　　林淑美

　　彼日拄著工友簡哥講：「恭喜呢！來四冬欲轉去矣，原仔會毋甘呢！」我煞嚨喉管滇接袂落去。北漂來到異鄉食頭路欲調轉去下港確實真僫，消息公佈是同事查榜的，我實在無勇氣。姊妹仔伴哭咧衝出來共我攬牢咧講：「成功矣！成功矣！」一時間我煞毋知是欲歡喜抑是艱苦，鹹酸苦澀佇腹內咧滾絞。

　　四冬前考牢老師，添志願的時無人敢添這間學校，干焦我青盲毋驚銃。校長大的常在招我欲創啥創啥，我攏共應好。到今伊毋捌差教甲半項，顛倒我定定共教務處允一寡穡頭，總是一句怨嘆都無，閣和我痟參落去。電腦歹去，一通電話共lóo過去，總務處隨共咱處理好勢，攏袂面漚面臭激歹面，閣共咱會講物件濟人用往往攏會啦。

　　第一擺教自然，我這个菜鳥仔是備課備甲會呼雞袂歕火，佳哉我的心臟有夠大粒，這陣囡仔做我的白鳥鼠。原來除了本土語，自然課我嘛有法度教。二年仔的老師看我孤鳥插人群，下晡時仔招我讀經典，走揣安定自我的力量，利益眾生是咱做老師永遠的功課。下班了後的運動團那運動那講笑談，予阮跤鬆手弄，身體精神齊輕鬆。若講著辦公室的姊妹仔伴，中晝食飯門共閂起來，笑聲是強欲共厝瓦掀起來。這回驚我調轉去下港予人欺負，就三叮嚀四交代：「愛講袂曉、毋捌、無做過。」一个替我寫簡歷，一个愛我學會曉拒絕別人的勇氣，因為知影這號死人性若無改會做死。尤其是如仔老師驚我枵著，四秀仔攢咧予我拜五下晡趕車硩腹肚。啥人講北部人無情，這號疼惜咱的人情，是欲按怎還？

　　四冬的單身生活，對礙虐到學會曉享受，是練習走揣家己的自在；佇北部享受予人疼惜的日子，是性命中的幸福。葉石濤捌講過：「臺南是一个適合咱人眠夢、作穡、戀愛佮結婚的所在。」今我欲轉去連空氣欶起來都有甜味的城市，總算免南北二路逐禮拜走傱，不而過心內酸酸，剝袂開的煞是這个予滿滿的愛包牢咧的風城。我想離別的練習，凡勢閣愛來一擺。(TOP)

 

10多謝囡仔予我的肯定　　廖啟助

　　佇面冊頂懸當咧看朋友分享的相片，雄雄一个訊息跳出來，頂面寫講：「師父，我今仔日已經掛階矣，感謝師父過去的栽培！」

　　原來是我十一冬前所𤆬的資優班的徒弟仔，因為某種緣故，伊干焦讀一冬的國小資優班就離開矣。後來佇國中的同窗會，我才知影伊去讀中正預校。透過面冊才了解，伊預校畢業了閣考著官校。

　　平常時仔逐家攏無閒，連繫嘛足有限，所以收著這个訊息對我來講非常的感動。我共伊祝賀，順紲對伊講不敢當。我予你的指導足有限的，是你無棄嫌我，共我遮爾看重。佇你讀軍校畢業掛階的第一時間，就傳訊息來佮我分享這个好消息，真正足感心的，伊隨共我講：「一日為師，終身為父！」

　　因為這个徒弟仔的分享，閣予我想起另外一个囡仔。自伊國小畢業一直到今，逐冬的教師節攏會特別傳訊息共我說多謝，祝福我教師節快樂。

　　頭起先的兩三冬，我想講可能是國小拄仔畢業，所以較會數念我。想袂到紲落伊讀高中、讀大學，仝款逐冬傳訊息來祝賀我。講正經的，我真感動。所以佇前幾冬，我特別共我的感受回傳予伊。

　　我講：「多謝你逐冬的教師節攏傳訊息祝福我，雖然內容攏無足長，毋過遮爾濟冬來，無一冬閬過，真正予師父足感動的！有時我咧想，我敢真正有佇你的身上，特別做啥物代誌抑是付出啥貨，是按怎你會一直共我這个師父囥佇你的心肝頭？雖罔你攏對我講足感謝老師過去對你的疼痛佮關心，才有今仔日的你！毋過我顛倒想欲共你講，其實是你咧鼓舞我這个做先生的人。因為有你長年來的肯定，我才會勉勵家己無論如何，一定愛做囡仔性命當中的貴人。」

　　我捌的代誌真少，我會當教予囡仔的閣較有限，毋過我知影，咱咧做，囡仔佮家長攏有感受著。咱愛用心牽教每一个囡仔，因為咱一句關心、鼓勵的話，真有可能就是這个囡仔佇伊這世人上重要的支持。只要用心，相信咱的教育會愈來愈光明，多謝囡仔予我的肯定。(TOP)

 

11囡仔　　洋洋

　　囡仔，你佮我無仝款，因為你有勇氣通去追求你的理想。

　　細漢的時陣，你規工共阿母搝牢牢、綴前綴後。這馬你佮阿爸仝一个時間咧看世界盃的跤球比賽，煞是佇無仝所在咧看。一个佇英國、一个佇臺灣，兩个蹛『Line』面頂做陣討論比賽。我咧想，距離敢若毋是啥物問題，因為咱的心攏倚做伙。

　　前年的這馬，阿爸、阿母希望你佇臺灣大學畢業了後，才出國去讀研究所。毋過你認為為著一張國立大學的文憑，共上寶貝的青春日子囥佇無興趣的科系，毋是你欲挃的。你提著國外的獎學金，想欲走揣家己的未來，追求家己的理想，想欲去英國讀冊。你講：「這是我的人生，我欲家己決定。我無愛佮你仝款做一个老師，我欲做我家己。」

　　囡仔，你雄雄欲出國讀冊，阮誠毋甘，因為阮心內猶未準備好勢。晟養二十冬的寶貝查某囝，煞雄雄欲離開爸母的身軀邊，阮哪擋會牢？你敢知影，阿爸、阿母這世人，頭一擺去廟裡跋桮，就是為著你欲出國的代誌，毋知出國會平安順序袂？了後阮想通矣！只要阮想會開、放會落，你才有法度去追求你的夢想。

　　目一𥍉，已經過一冬矣，你不時仔就敲『Line』的電話，喙笑目笑佮阿爸、阿母開講，講以早你的想法、講這馬你的看法、講以後你的工課。講甲『Line』的電話強欲燒去，你電話猶是毋願掛掉。逐擺佇『Line』面頂，阮攏會講：「細膩喔！愛注意安全！」這就是序大人疼惜序細的心，疼痛家己上愛的囡仔。

　　佇一冬內，你慢慢仔體會阿母捌共你講的道理。你感恩爸母支持你，予你有法度安心讀冊，免煩惱下一頓佇佗位；你嘛了解人生的意義是做對社會有幫贊的代誌。

　　囡仔，你就親像風吹，阮若搝絚絚就飛袂懸。干焦放予去，才飛會懸、飛會遠！按呢你有你的天地，我有我的天地，咱的天地嘛閣較闊、閣較大！

　　囡仔，你佮我無仝款，因為你有勇氣通追求夢想，阿母佩服你！阿母希望你永遠平安快樂！(TOP)

 

12同窗　　張月惠

　　這幾冬來，我誠欣羨身軀邊的親情朋友有同窗會通好參加，有人閣固定逐年一擺，上無嘛兩、三年一擺，啊若我咧，一擺都毋捌參加過，干焦會當徛佇邊仔癮爾爾。

　　對小學讀到研究所，我毋捌參加過半擺同窗會。毋知是我人緣䆀，抑是我的同學原本就較貧惰，橫直都無人來揣我。我嘛知影家己的喙水無好，無才調去招同學聚會。就按呢規日顧看人參加同窗會，家己踮邊仔看有食無干焦癮，數想甲喙瀾強欲津落來。

　　舊年底，專科的老班長敲電話來予我，講欲開同窗會，我歡喜甲跳起來，足想欲撥工去參加。干干仔代誌仙撨都袂拄好，致使佮同學見面的機會煞拍損去。我安搭家己講橫直有一就有兩，後過決定會閣開同窗會，時到才來參加。日子一工一工過，哪會攏無聲無說咧？

　　雄雄有一工接著電話，有幾个仔同學欲對下港起來清水看阮彼班的阿弟仔，問我欲做伙去無？手摺簿仔掀開看內底的行程，都合真無拄好，有一个會愛參加，無法度做伙去。三講四講，講規氣專工欲斡過來看我。我真歡喜，隨約好佇媽祖宮邊仔的咖啡廳相等。

　　彼工我會開到半中站就趕去咖啡廳，同學攏佇遐矣。人未到，早就替我共咖啡叫好矣。遮爾濟年，猶會記得我無愛啉燒的，嘛無愛冰的，會遮爾貼心，干焦老朋友會爾爾。我臨時臨曜煞認袂出寶龍，予無牙佮阿甫笑我目睭霧霧，菝仔看做蓮霧。我知影逐家攏有歲矣，敢有需要按呢互相落氣咧？

　　規陣坐佇通俍的窗仔邊，講天講地、講鱟桸講飯篱，歡喜到地矣，干焦有鼻著咖啡的芳味，煞袂記得落喉是苦的。免偌久心肝窟仔攏燒烙起來，袂輸閣踅轉去向時仝班讀冊的時陣。人會老，毋過同窗的心情佮記持攏無變。這種厚厚的人情味，不時都予我數念袂煞。總是我猶是真歡喜三十外年後，閣有同學來相揣。

　　天地闊莽莽，對千做同窗，有法度閣相拄頭，正經愛感謝天公伯仔予咱福氣，咱著好好仔共寶惜。(TOP)